Aizawl: Transport department chuan Mizoram pawna service tur bus 13 a sak tir mek a, heng bus te hi Indore, Madhya Pradesh-ah sak mek an niin kuminah chuan peihfel hman tum a ni.

Transport Minister TJ Lalnuntluanga chuan he thu hi sawiin a tirah chuan bus hi 14 lei an tum a, mahse tunlai thilman sang zelah sum harsatna a vangin 13 lei an titlu ta zawk niin amah kawmtu chanchinbumite hnenah a sawi.

State danga MST service tir chungchangah Transport Minister chuan Churachandpur (tihfel tawh) leh Tripura lam chu covid vangin bawhzui theih a nih loh thu a sawi a. Tahan (Myanmar) a bus service tur chu Ministry of External Affairs kutah a awm tih sawiin Mizoram pawna tlan thin bus-te chu thlak vek tum a ni tih a sawi bawk.