February 8, 2024; Mizoram Stae Day (20.2.24) ah chawnghei tawngtai neih a ni dawn a, tawngtaina hmun tur AR Lammual ah sumdawnna chi reng reng tih phal a ni dawn lo.

Vawiin Aizawl Press Club a thuthar thehdarhtute an kawmna ah State Day of Prayer Committee (SDP) Working Chairman F. Rodingliana (MoS) chuan, chief minister Lalduhoma thurawn angin, State Day of Prater Committee din a ni tih a sawi. 

"Chief minister duhsakna hnuaiah he ni hi ram pum huapa sual ngaihdam dila chawnghei tawngtai beipui 'Ninevi Challenge' atana hmangin, AR Lammual a buatsaih turin ruahmanna a kal ta nghal," F. Rodingliana chuan a ti.

SDP in ruahmanna a siam dan chuan, Mizoram State Day ah hian Lammual ah zaihona leh tawngtai hona zalen taka neih tur a ni a, chief minister in chawhnu dar 1 ah Inaugural address a nei ang a, chumi hnu-ah tawngtaina programme neih zui a ni ang.

SDP in hriattirna pawimawh a siamte:

1. Kawng zawh : AR Lammual pan tur hian chhim lam atanga lo kalte Sikulpuikawnah innghahkhawm nise, Aizawl West lam chu Vaivakawn ah, Hmar lam atanga lo kal turte Chanmari kawn ah innghahkhawm a, chung hmun atang te chuan a rual a kal chhuakin, chawhma dar 11 a Lammual thleng hman tura kawng zawh buatsaih tur a ni. (Kawngzawhna a tel hman remchang lo tan Lammual hi mahni hmun atanga pan khawm theih a ni bawk.)

2. Lammual a chawnghei tawngtaia kal turten mahni rilrua a lan danin, Saiip/Zothuam inbel theih ni se, saiip puan nei remchanglo te tan lammual gate ah lak theih a ni bawk.

3. Mahni rilrua a thawh dan a zirin thuziak hrang hrang- poster leh placard te, flag te ken nise, a duh tan kraws put chhuah theih a ni. A tlangpuiin chung thuziakte chuan kan rama sualna namenlo avanga Pathian hmaa sual ngaihdam dilna te, Pathian thuawihna lam hawi thuziak te ni thei se. Bible chang tarlan a tha hle bawk ang.

4. Chawnghei tawngtai tur kan nih avangin ei tur ken luh loh tur, tui bottle erawh ken phal a ni.

5. AR Lammual chhungah sumdawnna chi reng reng tih phal a ni dan lo, ei tur zuarte pawhin hung pawnah ve ktih tur a ni. 

6. Bible leh hla bu leh note bute ken luh theih a ni. 

STATE DAY CELEBRATION COMMITTEE - 2023 (STATE DAY OF PRATER) press statement

Kan missionary te zarah Kristian ram tiin kan inchhal a, Mizote hian February 20, 1978 atang khan State puitlinga hlan kai kan nih hriatreng nan kum tin State Day kan hmang thin a, official function bak engah mah Kristian kan nihna lantir zawnga tih a la awm ngai lo. 

State kan nih hnua Mizoram awm dan hi ringtute leh tawngtai mite tan a khawp kham ta lo niin a hriat a, chuvangin tuna kan sawrkar lo din phat atang khan ram pum huap a Pathian hnen a tawngtai ni hmang ve tawh turin Pathian mi thenkhatte leh kan CM ngei pawhin lo sawi tawhin, chu chu ram mipuite thinlungah cham rengin, February 5, 2024 khan mi thahnemngai intelkhawm ten CM an kawm a, an sawihona atangin, ani chuan State Day of Prayer Committee din nise a ti a, chu committee chu din a ni ta a, ama duhsakna hnuaiah he ni hi ram pum huapa sual ngaihdam dila chawnghei tawngtai beipui 'Ninevi Challenge' atana hmangin, AR Ground a buatsaih turin ruahmanna a kal ta nghal a ni.

He committee member ah hian Ministry te leh prayer group hrang hrang, Para Church, YMA, MZP, MHIP etc.te aiawh pawh ruat vek an ni.

State Day of Prayer Committee hruaitute :

Patron - Upa Lalduhoma, CM

Chairman - Rev. Dr. K. Thanzauva

Working Chairman - Upa F. Rodingliana, Minister

Vice Chairman -

1. Rev. Darchungnunga

2. Upa Dr. R. Vanlalzauva

General Secretary - Upa Dr. PC. Biaksiama

Secretaries - 

1. Pi Zothanmawii

2. Upa C. Lianzuala

Treasurer - Pi Babie Zonunmawii

Senior Advisers -

1. Rev. C. Lianzuala

2. Upa Lalhluna