Aizawl : Central sawrkar-in state danga hnathawk leh zirlai tangkhangte an state-a an haw dan kawng a dap mek laiin India ram khawpui hrang hranga Mizote chuan an haw hun tur ngaichangin Mizoram sawrkar hmalakna nghakhlel takin an thlir mek a. Mizoram pan duh zingah Bihar atanga Mizoram pan tum Mizo aiin Bihari an tam zawk.

India ram state leh khawpui hranga hranga Mizo welfare hruaitute ZALEN-in a biakpawh chinah tangkhang te hian haw hlan an nghakhlel tlang hle tih a hriat a, welfare hrang hrang hruaitute hian central sawrkar lamin heng tangkhangte tana rel service a buatsaiha an tel hun tur nghakin Mizoram sawrkar thu an ngaichang. Welfare lam hian kawng tam takin Chief Minister’s Relief Fund atanga an sum dawn chuan chhawk mah se, tam tak tan chuan kar khat nghah pawh rilru hahna tham a nih thu an sawi.

Central India lama awm - Delhi, Uttar Pradesh, Bihar, Madhya Pradesh, Uttarakhand state khawpui hrang hranga awmte chuan an chuanna tur rel an chan ve hun tur an nghak tawp niin an sawi hlawm. Allahabad-a awm Mizote chuan sawrkarin an hawna tur rel a ruahman hun an nghak tawp niin an sawi a, haw tur hian mi 73 vel an in-report tawh tih an sawi a, sawrkar lama mi langsar dawr tur an hriat loh avangin Mizoram sawrkar chu an inngahna awmchhun niin an sawi.

Bihar lama Mizo welfare chuan boruak danglam tak an nei a, an president David Vanlalvuana chuan Mizo haw duh in-report 20 an neih rualin Mizorama sawrkar hnuaia thawk, Mizo haw turte ruala Mizoram pan ve tum Bihari mi 41 an awm tih ZALEN a hrilh a, anni hi Mizoram a sawrkar hnathawk nghet an ni a, arrangement pawh an siamsak tel niin a sawi a. East & Central huam chhunga awm an nih angin Mizoram sawrkarin an rel chuanna tur a ruahmansak nghah bak chu tih theih an neih rih loh thu a sawi bawk.

Uttarakhand state Dehradun Mizo Welfare hruaitute chuan tangkhang hi mi 145 vel an nei niin an sawi a, a tam ber hi zirlai an ni. Tunah rih chuan harsatna em em an tawk lo niin a lang a, sawrkar lamin rel a ngaihtuahsak hun an nghak ve bawk. Delhi lam nena pawh an inbe ve reng tih an president Rev. Vanlalrosanga Ralte chuan a sawi a, hetihrual hian Lalrinliana Fanai, IAS chuan Dehradun atanga Rel-a haw dan tur a ngaihtuahpui a, he state chhunga khaw dang, Nainital, Rishikesh leh Haridwar a awm te pawh huam tel tir an tum niin a sawi bawk.

India ram khawpui ber Delhi lamah hian haw tum mi 2000 an chuang tawh a, anni pawh hian Mizoram sawrkar hmalakna an ngaichang deuh tawp niin welfare hruaitu ten an sawi. Delhi lam hruaitute chuan ngaihtuahawm em em chu an awm rih lo niin an sawi a, chutihrual chuan an hnena in-report te hi Delhi leh a chhehvel bakah Chandigarh, Noida leh Uttar Pradesh huamchhung khawpuia awm te an nih fur thu an sawi.

Hyderabad Mizo Association lam chuan haw tum in-report 560 vel an nei tih an sawi ve bawk a, anni pawh hi Rel a haw tuma hmala mek an ni. A tirah chuan registered member 450 vel bawr an nei thin a, Covid -19 len hnu hian in-report hi an pung ta hluai niin an sawi. CM Relief fund atangin mi engmaw zat an puih tawh thu ZALEN an hrilh a, an inchhut dan chuan Mizo hi 1000 dawn he khawpuiah hian an awm niin an hria.

Central India-a state lian ber zinga mi Madhya Pradesh lamah hian khawpui hrang hrangah Mizo tangkhang hi an thahnem hle a, Bhopal, Jabalpur, Indore, Anwar leh Mayur lama Mizo tangkhangte hi an mangang tlang hle. Anni hian zirlai hi an kawl tam lutuk lo a, hnathawk an tam, chutih rualin sawrkar hnathawk pur tur an neih loh thu an sawi hlawm. Indore atanga thu dawnna chuan, an awmna atanga hla deuh taka awm Anwar-ah hian TBZ missionary zuk tlawh tangkhang an awm niin a sawi a, Mayur lama sipai chhungkua tangkhang te nen pawh an inbiak thu an sawi. Chief Minister relief fund atanga an sum hmuh te chu thenkhat tan intunnunna a ni tawh tih kan biakpawh te hian an sawi a, sawrkarin an chuanna tur Rel a ngaih-tuahsak thlen hun chu an innghahna a nih thu ZALEN an hrilh a, hmalak vak ngaih-na an hre lo. Heng khawpui hrang hranga awm te hian inthurual dan tur pawh an hre lem lo niin an sawi bawk.

India chhim leh khawthlang lam- Chennai lam atanga mi 900 dawn an rawn haw hnuah tunah hian Karnataka ah zirna avanga awm leh eizawng mi 1440 te chu Mizoram rawn pan tumin an tan bika ruahmman Rel nghakin an inring reng tawh a, Central leh Mizoram sawrkar ruahmanna siam hun an nghak mek. Mumbai lama mi 780 velin an Rel chuanna tur an nghak ve mek bawk a, anni hi zirlai leh hnathawk vek an nih thu ZALEN an hrilh. Mumbai atang hian hian Maharsatra state chhunga khawpui lian pahnih Nagpur leh Pune a awm te pawh an tel dawn tih Mumbai Mizo Association secretary V. Lalrindika chuan a sawi.

Karnataka hi report chinah Mizo tamna ber a chhal theih a ni a, anni hian rei tak atang tawh khan an awmna state thlazar hnuai-ah Bangalore a Mizo pawl hrang hrang ten Chawlhbuk tia an hming an vuah chu an lo enkawl tawh tih BMA president Laldingliana Tlau Vantawl chuan a sawi a, hetah hian mipa 100 dawn leh hmeichhia 50 chuang chu an ei leh in tur thlengin an tum sak. Bangalore a cheng chiah lo, Mizoram pan tur te pawhin he Chawlhbuk hi an bel rih zel a ni. Bangalore atanga rel a rawn haw tur chuan man Central sawrkar bak 15% leh Rel station panna tur hi Rs. 1180/- niin, Bangalore Mizo intelkhawm te hian Rs. 500/- an tum sak dawn a, a haw tur te hian Rs. 680/- an tum ve thung ang.

Gujarat leh Rajasthan lam hi West zone an ni a, tun tuma Rel tlan dan turah pawh west zone zai ngai tur an ni. Gujarat-ah hian Mizo 400 bawr vel khawsa angah an in ruat a, mi 373 vel chu haw tuma inziaklut an ni a, anni hian tunah rih chuan harsatna em em an nei hran lo a, mahse, a tam zawk hi hna sang lo tak tak thawk an nih avangin sawrkar lamin hma lak ran sak se an duh a, Rel chuanna tur an nghah tawp thu an sawi.

Zone ang chuan Rajasthan hi Gujarat leh Goa te nen inthurual tur an ni a, mahse, tun thleng hian chet dan tur an la hre chuang lo. Mi 180 vel haw turin an inbuatsaih a, Mizoram sawrkar an nghak a, chutihrualin an state sawrkarin Nodal officer tura a ruatsak nen inbiakna an neih ve reng thu ZALEN an hrilh. He state khawpui Jaipur-a Mizo Welfare hruaitute hian buaina hranpa tak an nei a, Rel-a chuan tir lo tura an chhungte leh khawtlang atanga nawrtu an nei hi a ni. Heng ho tan hian an Nodal officer hian Bus a ngaihtuahsak mek a, Mizoram Chief Secretary lam atang pawhin phalna an nei tawh niin an president Lalbiakmawia chuan a sawi. Rel-a an haw hun turah mi tam tak an buai tih a sawi a, chutihrualin sum leh pai-ah harsatna tawk an neih nual avangin an thlaphan thu a sawi bawk.

Thawhtanni ah Kolkata, West Bengal lam hian Thawtanni atangin Mizoram lam hi an rawn pan tan dawn a, zing dar 7:00-ah Mizoram House, New Town atangin Bus leh lirthei dangin an rawn kal ang, mi 118 an ni ang, convoy a rawn chho tur an ni.

Kolkata atanga rawn haw tum hi report dawn chinah he thu buatsaih lai thleng hi chuan mi 497 an ni a, a tah tawla kal turin ruahmanna an siam a, Mizoram lama quarantine centre thlen theih dan milin ruahmanna kalpui an tum a. West Bengal district hrang hrang atanga haw duh te Mizorama an awmna district mila haw tir dan tur an duang chho mek, tih Kolkata Mizo Welfare secretary Lalbiakzuala chuan ZALEN a hrilh. Naktuka rawn haw tur te hi an kalkawng ei leh in man tur te welfare hian an tumsak bawk a ni.

Sawrkar chhinchhiah chinah state pawn atanga lo haw tur hian in-report mi 10,496 an awm a, Aizawl district-ah mi 4413, Lunglei district -916, Kolasib district -579, Serchhip district -407, Mamit district -567, Siaha district -1011, Lawngtlai district -877, Champhai district -714, Saitual district -232, Khawzawl district -187 leh Hnahthial district mi -127 an ni.