Aizawl : Nimin khan Zoram Peoples’ Movement Party thalai chuan, Ni 18.12.2020-a MNF-in an thu chhuaha SYS Dept-in state sum 2019 atanga la hmang lo anga an insawi hi dawt chiang tak a ni, tiin thuchhuah an siam.

ZPM thalai chuan an thuchhuahah hian 2019-20 Supplementary Demand ah khan Nuai 1796.35 zet SYS khan a dil belh a, nuai 144.84 kha Central (CSS) niin a dang zawng nuai 1651.51 kha state sum ngei a ni bawk. Chu mai a ni lo va, CSS nuai 144 atanga nuai 50 phei hi chu Central atanga Social Welfare sum dawn tur State Games atân an pawh pen a ni, an ti.

“SYS tân hian SEDP atangin nuai 519.60 zet dil belh a ni a, heta tang hian infiamna bungraw leina atâna nuai 90 an hman te, an hmai uân-pui êm êm Leisekawt Field siamna leh bang remna atâna nuai 245 an hman te, Sakawrdai Mini Sports Complex atana nuai 21 an sen leh N Vanlaiphai Football Field Pavillion sakna nuai 50 zet an dil belha an hman zawng zawngte kha a hranpaa an hai chhuah ni lovin SEDP sum vek a ni a, hmanni lawka insawitheihna atâna an hman, vawiina an hre leh duh tawh miah lo hi ZPM thalai chuan mak kan ti,” tiin an thuchhuahah hian an tar lang.

MNF Party-in an dawt sawi hliahkhuhna tura dawt dang an sawi thin an la sim lo hi pawi kan ti a; an thu chhuah hi thu dik haider a, hre reng chunga dawt thu ringawt hi an chhuah anih chuan mipui zah lohna lian takah kan ngai a, hetianga khaw êng pawh zah zo lova mipui bum tumna thil hi tun hnuah vawi khat mah thlen nawn tir tawh lo turin MNF party chu kan ngên a ni. Central atanga sum hailût thei bik riau anga kan Sport Minister a insawi thin pawh hi mipui bumna mai a ni tih a chiang hle a ni, an ti bawk.