Aizawl May 26, 2023 : ZPM Political Session chu vawiina neih leh a ni a, hun hmangtu Ward No. 3 Corporator C. Lalchhandami chuan hmasawn nan ram hruaitu-ah thui tak a innghat a ti a, state tam takin an hruaitute avangin hma an sawn a, hruaitu neih that pawimawh zia a lang niin a sawi.

C.Lalchhandami chuan, “Ram leh hnam hmasawnna hi ram hruaituteah thui tak a innghat a. Kan ram India-ah ngei pawh tun hnai maia thil thlengah state thenkhatte chu an hruaitute avangin hma nasa takin an sawn tih kan hria a ni,” a ti a. 

State thenkhat hmasawn dan sawiin Ward No. 3 Corporator chuan, “Punjab CM Pratab Singh Kairon chuan irrigation tha tak nen an rama leilet zawl chu chei thain an ram ei leh bar dinhmun nasa takin a chawikang a; Himachal Pradesh CM Yashwant Singh Parmer pawhin Apple hmangin an State economy nasa takin a chawikang bawk. Andra Pradesh CM Chandra Babu Naidu pawhin Fisheries-ah nasa taka hmalain an ram a chawikang a; Bihar CM Nitish Kumar te, Sikkim CM Pawan Kumar Chamling te pawhin nasa takin an ram din hmun an chawikang a. Delhi CM Arvin Kejriwal hnathawh pawh kan hre theuh awm e. Heng atang hian ram leh hnam hmasawn nana hruaitute pawimawh zia kan hre thei awm e,” a ti.

Power a intodelh lohna sawiin, “Tunah hian Mizoram hian Mini Hydel Project leh Solar Power Generate lai pariat kan nei a. A lian ber Serlui B.Hydel Project hi thal lai chuan a nil deuh thaw a. Heng kan Hydel Project te hi thal lai chuan an nil deuh vek a, kan State kham khawp ngaw ngawr pawh an thar chhuak lo, State dang a mi sum tam tak sengin kan lei a ngai a, mipuiah a man tlawm zawka hralh leh a ngawi bawk si, a manganthlak hle a ni,” a ti. 

Ward No. 3 Corporator chuan, “Ram hruaitu tha chu ram leh hnamin a mamawh dik tak hriaa thawk chhuak thei tura theihna nei hi a ni. Kum 35 State kan nih hnu pawha kawng hrang hranga kan la intodelh loh zia atang hian kan ram hruaitu mai bakah a ram mipui hian a mawh kan phur. Hemi siam tha leh tur chuan hruaitu tha leh kalphung thar kan mamawh a, mipuite pawh kan taimak tel a pawimawh bawk. Thalai te an thang harh mek a, chutiang bawkin hmeichhiate pawh awm mai mai lovin rilru thar nen kan ram tan an thawk a ni. Hmeichhia te hi ram leh hnam goal vengtu kan ni a; huaisen leh taima taka kan thawh chuan kan ram hi kan tung ding thei a ni tih i hre thar theuh ang u,” a ti bawk.