Aizawl: Mizo National Front party chuan Mizoram chu a tum hnih nan India rama state hlim berah (happiest state) puan a ni tiin lawmawm an tih thu an sawi.

Nimin khan Aizawl Press Club-ah chanchinbumite kawma he thu hi sawiin MNF Joint Secretary leh AMC Ward 17 Corporator David Zohmangaiha chuan, “Chief minister kaihhruaina hnuaiah hian Mizoram hi a chhe vek lo mai ni lovin, India rama state awhawm ber pawl leh hlim ber kan nihzia chu phai lam mi thiam, a zirchiangte ngeiin an rawn puang hi a lawmawm tak zet a. Party thenkhatin Mizoram chu chhe vek anga mipui bum tuma kawng hrang hranga an beihna chu dawt a nihzia a tilang chiang hle a ni,” a ti.

David Zohmangaiha chuan, “April 20, 2023 mai khan zirchianna hmanga uluk taka endik a nih hnuah Mizoram chu a tum hnih nan India rama state hlim ber (happiest state)-ah puan kan ni a. Zirchianna hi Gurugram khawpuia Management Development Institute hotu pakhat, Professor Rajesh K.Pillania kaihhruaia neih niin, tehna hrang hrang hmanga endik a nih hnuah India hmarchhak kila awm Mizoram chu rampuma state hlim bera puan a ni ta a ni. Hei hi national media liante pawhin an puangzar a. Kum 2020 khan Mizoram hi state hlim berah puan kan lo ni tawh a ni,” a ti bawk.

India ram state hlim ber kan nih theih chhan chu sawrkar vang tih sawi bawkin, “Zoramthanga kaihhruai sawrkar hi chhe lailet derah mi thenkhatin chhuah mek mah se an puh ang a nih lohzia a lantir chiang hle a. India ram thang chhuak khawpa rorelna tha kalpui a, state hlim bera min siamtu Zoramthanga kaihhruai hi MNF chuan kan chhuang tak zet a ni,” an ti bawk.