Bank hi mipuite sum dah thatna mai a ni lo a, sum hmanga sumdawng tur an ni a, an tum ber chu an sum kawlte dah ngawt ngawt loa vir (circulate)-tir a ni. Bank dawrtute sum dah luh chu a awm tawp a nih chuan hlep engmah an nei dawn lo tihna a ni a. Hemi avang hian bank hnathawkte chuan policy siamin sum virtir tam theih dan tur an ngaihtuah char char a ngai a, sum lut te chu a pung awma puktirin chumi chu chuan hlep a siam ang a, an puk chhuah tamtir poh leh hlep siam tam tura beisei an ni bawk a ni.

Electronic hmanraw hmangin sum a che nasa tawha, ‘digit’ chu sum a ni ber tawh zawk a, bank lam pawhin sum an lo siam ve zel a. ATM enkawlna atangte pawhin hlep an siam thei zel tawh a, hmanraw thar changkang chhuak zel mah se pawisa kan hman chhung chuan emaw, a thlawnna engkim kan nei thei vekte a nih ngawt loh chuan sum che vel atang hian bank lamin hlawkna an nei zel dawn tihna a nih chu.

State Level Banker’s Committee (SLBC) Mizoram chu tunhnai khan Chief Secretary hoin an thukhawm a, State Bank of India chief general manager (NE circle) pawh a rawn tel a ni. Mizoram puma bank-te loan pek chhuah zat credit deposit (CD) ratio chu 45% a ni a, Aizawl district bikah bank te’n loan an pe chhuak tlem lehzuala an CD ratio chu 36% chauh a nih thu he thutkhawmnaah hian sawi chhuah a ni bawk a. Sum dah luh atanga loan pek chhuah (credit ratio) hi 70% ver bawrah a awm a tha ber a, sum lut zawng zawng chu puk chhuahtir vek a him bik lo a ni.

Tunlaiin India economy a tlahniama politic hmanga inbeihna lian tak pakhat a ni bawk a. ‘Inflation’ a san emaw, economy a hniam emaw chuan mipuiin sum an hmang tha duh lo a, sum virvel a tlem thin a. Hetiang a nih chuan Reserve Bank of India-in a tihdan pangngaiah chuan sum tawmim tiche tur chuan pung tlem zawkin bank-te chu loan an pek chhuahtir a, in leh lo, car leh inchhung mamawh thlengin loan an pe a. Hei hian nasa takin sum a ti che leh thin a ni. Ngai awh a nih hunah bank lam pawhin an hamthatna pekte chu an titlem a, dinhmun a that loh deuhin a ngai ang hian an kal leh mai thin a, hla bial sak ang deuh a nihna chen a awm.

Kan credit ratio a bikin Aizawl district lama a hniam em em mai hi enzui a ngai hle a, tunlai hian bank lam chuan ‘loan mela’ te siamin beihpui an thlak ngei mai a, hei hi ngaihthatna tham a ni em? tih chu hunin a hril dawn chauh a. A thuhrimin bank lamin loan pek chhuah an harsat ta lutuk hi a dik lo a, thalai dinchhuah tum zingah a tam zawk hi chuan bank-te hi bul tan nan pan chi-ah an ngaih a rinawm loh. Tunaia dawr nuam zawk leh pan chakawm zawkah an inchhuah theih beisei phawt ang.