Aizawl June 30, 2022 : MPCC chuan thuchhuah siamin kum 2024 thlenga thawhhona thuthlung sawrkarin a siampui TATA Trust te chu MNF sawrkarin a ngaihsak that duh loh piah lamah TATA Trust hotute hnenah MNF sorkarin sum thahnem tak a dil avangin TATA Trust Academy, Mualpui a mi chu tih tawp a ni, an ti.

Congress chuan, Kum 2018 khan Lal Thanhawla kaihhruai Congress sawrkar leh TATA Trust te tangkawp chuan TATA Trust Football Academy, Centre of Excellence, Mualpui hmunah an din a. He Academy chhuak naupang zingah India Junior a tel engemaw zat an awm tawh a. Bengaluru FC leh Athletico Madrid Academy zawm pawh an awm tawh bawk, an ti. "Mizo naupang te'n an chhawr Academy hi kum 2024 thlenga thawhhona thuthlung siam chu MNF sorkarin a ngaihsak tha duh lo a, TATA Trust hotute hnenah MNF sorkarin sum thahnem tak a dil avangin TATA Trust hotute chuan TATA Trust Academy Mualpui hi an ti tawp ta a ni," an ti.

MPCC chuan, Mizo naupang tam takin hun reilote chhung pawha heti khawpa an chhawr tangkai ni si Mizoram sawrkarin a ngaihsak loh avanga hetia a tawp leh ta hi Congress Party pawi an tih thu an tarlang. "Sum leh pai ei theih tur zawnga project hmanhmawhthlak loh lian pui pui siam ringawt ngaihtuah lova, Mizo naupang infiam mite ngaihtuah zawk turin Congress Party chuan Sports Minister hi kan ngen a ni," an ti.