Aizawl: Mizoram sawrkarin June, 2022 thleng khan state pawn atanga kawlphetha leina man pek loh (ba) Rs. Vbc. 46.42 a nei a. Kawlphetha leina man ba awm chhan hi sawrkar sum dinhmun a that loh vanga a hun taka kawlphetha leina man pek theih loh chang a awm thin vang a ni.

Power & Electricity department-in RTI zawhna a chhan danin, kawlphetha leina man pek theih hun danin a bituk chhunga pek a nih loh chuan thla khatah Lay Payment Surchage (LPSC) 1.5% chawi theih a ni a, power supply tihtawpsak theih a ni bawk.

Tun dinhmunah Mizoramin state pawn NEEPCO, NTPC, NHPC, OTPC, TSECL leh CTUIL atang tein kawlphetha a lei mek a, a leina rate chu chawhrualin kilowatt-hour (kWh)-ah Rs. 5.56 a ni. 

Kum 2018-19 chhung khan kawlphetha leina atan Rs. 3,87,33,00,000 hman a ni a, 2019-20-ah Rs. 4,00,00,00,000, 2020-21-ah Rs. 4,30,00,00,000 leh 2021 -22-ah Rs. 4,00,00,00,000 hman a ni.

Hetihlai hian kawlphetha hman man atangin Mizoram sawrkarin kum 2018-19-ah Rs, vbc. 266.02 revenue a hmu a, 2019-20-ah Rs. vbc. 247.76, 2020-21-ah Rs. vbc. 197.84 leh 2021-22-ah Rs. vbc. 311.36 revenue a hmu a ni.

Kawlphetha leina atana sum senso sawrkar atanga hmuh chu hman zawh zel thin niin, tun hnai kum li, 2018-19 atanga 2021-22 chhunga kawlphetha leina atana sum sen zawng zawng chu Rs. vbc. 1,617.33 a nih laiin, hemi kum chhung vek a kawlphetha hman man atanga Mizoram sawrkarin revenue a hmuh zat chu Rs. vbc. 1,022.98 a ni a, kawlphetha leina aia revenue hmuh tlemna chu Rs. vbc. 594.35 a tling. 

Kawlphetha leina/revenue
(Rs. in crore)
Kum           Leina      Revenue
2018-19    387.33      266.02
2019-20    400.00      247.76
2020-21    430.00      197.84
2021-22    400.00      311.36
TOTAL      1617.33   1022.98