Aizawl: Congress chuan Covid-19 chungchangah Mizoram sawrkar chu sum harsatna zep lova kohhran leh pawl hrang hrang tanpuina dil zawk tura an duh thu sawiin CM Relief Fund-ah pawh Covid-19 dona tur pawisa tam lehzual a luh theih ngei Congress party chuan a ring tlat a ni, an ti.

Nimina thuchhuah an siamah Congress chuan Covid-19 vangin Mizoram hmun tinah ei leh barah harsatna nasa tak a thleng mek nia sawiin harsatna hian zual lam a la pan dawn chauh niin a lang a. Chuvangin, Mizoram sawrkar pawhin Local/Village Level Task Force-te kutah supply sem hna dah ringawt lovin, Mizoram kilkhawr ber thlenga ei tur mamawh chi hrang hrang supply a nih theih nana awmze nei lehzualin hma la se an duh tih an sawi.

Mizoramah he natna hi a la darh lo nia an hriat thu sawiin mahse India ram hmun dangah leh thenawm state-ah te a vei an pun zel si avangin ramri venhimna lamah sawrkarin nasa lehzualin hma la se an duh tih an sawi bawk.