Aizawl: ZPM hruaitu Lalduhoma MLA chuan MLA fund-a hnathawhah sum hman zat leh hnatawh inmila thawk turin a ngen.

Lalduhoma chuan Aizawl khawpuiah party hrang hranga inziak lut aiin politics-a neutral an thahnem daih tih sawiin, “ZPM chuan a theihna apiangah kalphung thar hi mipuiah pholan a tum a, chumi atana hmalakna lian tak chu MLA fund tha leh tangkai taka hman a ni a. Mi pamham pakhat avang pawha vai mualpho theih a nih avangin MLA fund-a hnathawhah sum hman zat leh hnathawh a inmil tur a ni,” a ti.

ZPM Aizawl North-II Block hruaitute leh Local Council inthlan neih zawh taka Aizawl North II bial chhung veng hrang hranga ZPM candidate-ten Whitestone Conference Hall, Ramhlun North-ah Zirtawpni khan Joint Meeting neih a ni a, Lalduhoma chuan hmanpuiiin he thu hi a sawi a.

Lalduhoma chuan AMC inthlan lo awm turah taima taka thawk turin kalkhawmte a chah a, AMC inthlan lo awm tawhah ruling party in sawrkarna an chang chuang lo tih sawiin, tunlai boruak thlirin AMC inthlanah hian ZPM-in beiseina sang tak an neih thu a sawi a, MLA atanga paih thlak tuma MNF Party hmalaknaah mipui khawngaihna amah leh ZPM Party-in a dawn nasat thu sawiin, ZPM chuan tawngtaina nen he buaina hi a hmachhawn zel thu a sawi bawk.

Dr. Vanlalthlana, bialtu MLA-in Local Council-a an candidate leh tling tharte lawmpuina thilpek a hlan a. Dr. Mathlana chuan a bial chhungah dik leh tangkai taka MLA fund hman a nih theih nan Local Development Committee veng tinah din a nih thu a sawi a. Mi harsa zawkte tanpui duhna thinlung puin, midang tana malsawmna ni tura politics luhchilh turin kalkawmte a sawm a ni.

Meeting-ah hian ZPM Party-in AMC Ward III-a an candidate tur Lalchhandami leh AMC Ward IV-a an candidate tur Lalsanglura Ralte te hmel hriattirna neih a ni a, AMC candidate-te hian thusawi-na hun an hmang bawk.