Aizawl August 16, 2024 : Vawiin khan Congress Bhavan Aizawlah 'Friday Political Session' neih a ni a, New Delhi-a All India National Executive and National Vice Chairpersons of Adivasi Congress Meeting-a tel Zodintluanga chuan an meeting report a pe a, New Delhi lama a sumdawng thian ten BJP an khi nasa a, tun term pawh an hmanzawh an rin loh thu an hrilh niin a sawi.

"INC hian kum 50 chhung zet mai Tribal-te kan enkawl tha hle a, tun hnaiah hmanraw chi hrang hrang hmangin BJP-te hian kan 'vote bank' te min chhuhsak a. Hei hi la let leh turin ruahmanna kan siam a ni, tih lam hawi hi kan thupui ber chu a ni," tiin Zodintluanga chuan an 'meeting' bulthut a sawi.

Zodintluanga hian a ngaih pawimawh bera chu Party mi sawi aiin, New Delhi lama a sumdawng thiante sawi a ni tiin, "New Delhi-a cham ta chu ka sumdawng thiante an lo kal a, Rahul Gandhi inthlak nasatzia te, a leadership hmasawn nasatziate an sawi a. Inthlan leh chu Congress sawrkar hun a ni mai an ti a, chu chu ka rawn hawn a ni," a ti.

"Sumdawng kan thiante chuan BJP an khi nasa lutuk hian tun term hi an daih lovang an ti. Home Minister Amit Shah leh Uttar Pradesh Chief Minister Yogi Adityanath inngeih lohzia te an sawi daih a ni," tiin MPCC Treasurer hlui hian a sawi.

India rama 'tribal' te BJP-in an hneh tawhte laklet theihna turin India ram puma 'Congress Election Manifesto' tur ngaihtuaha rorelte hian; "Tribal Regiment dinte leh International Day of the World's Indigenous Peoples" chu India-in pawm ve rawh se tihte an rel tih a sawi a. Ex-Minister chuan, "Keini chuan ZORO kaltlangin UN-ah Indigenous rights buaipuiin kan lut thuk tawh tih ka sawi a, a tih dan turte pawh an hriat duh angin ka report nghe nghe," a ti.

"AICC-ah hian Youth Congress kan nih laia (Mama hi MPYCC President a ni thin a) kan thawhpuite G/S leh Secretary, MP ni laite an lo kat nuk a. Inkawmhona kan nei a, election awm leh hun huna sawrkar turin an awm. Tuna state 3 inthlang turah pawh an boruak a sanga an chapo loh thu erawh an sawi a, India ramah Congress hian hma a sawn a ni," tiin Zodintluanga chuan a sawi.

An rawn haw lamah Mizoram MP Richard Vanlalhmangaiha nen an rawn haw dun tih a sawi a, Parliament House-a Rahul Gandhi te huaisenzia a sawi nasat thu a sawi tel bawk.