August 4, 2022; Aizawl khawpui chhung a sumdawnna peng hrang hrangah hnamdang (vai) ten bu an khuar mek zel a, dawr luah man an ngam san vangte in sumdawnna thenkhatah chuan Mizo sumdawngte tan dawr luah tur hmuh mai pawh a harsa tawh nia thudawn niin, Mizo hming hawh a sumdawnna kalpui pawh an tam hle nia thudawn a ni bawk.

Mizoram Merchant Association (MIMA) hruaituten ZALEN an hrilh danin, MIMA hnuai a sumdawng pawl thenkhatte chuan MIMA ah harsatna an tawhte an thlen fo thin a, chung zingah chuan hnamdang sumdawngte vanga harsatna an tawh chu an thu dawn tam ber a ni.

MIMA hruaitute sawi danin, Aizawl khawpui chhungah in sa thar, dawr hmun remchang luah tur a awmin, hnamdang sumdawngten an chuh chak thin hle a, an luah theihna tur a nih chuan a neitute chhiar aia sang pawh a an luah ngam thin avangin, Mizo sumdawngte tan chan a har thin a, hemi kawngah hian hnamdang sumdawng ten tunlai hian tan an la nasa zual nia hriat a ni.

Rod leh cement lama sumdawnna ah phei chuan, tun dinhmun a Aizawl a dawr awm zawng zawng zinga za a 80 vel chu hnamdang dawr a ni tawh tih MIMA hruaitute chuan helama sumdawng pawl hruaitute hnen atangin tunhnai ah report an dawng tih an sawi.

"Mizo hming hawh a hnamdang sumdawng hi sumdawnna peng hrang hrangah an tam niin a lang a, Mizote tun atangin kan tanrual a ngai khawp mai, a nih loh chuan chimralin kan la awm dawn," MIMA hruaitute chuan an ti bawk.