May 25, 2023; Aizawl khawpui chhung, a bikin New Market leh Zarkawt huamchhung ah zing khawvar hma atangin hnathawk an phu suau suau zing tin a, chung zinga a tam zawk chu hnamdang an ni.

ZALEN in a hmuh danin, a bikin heng hmunte hi sumdawnna hmun pawimawh leh lun zuallai te an ni a. Lirthei lut chhuak pawh zing khawvar hma atanga zanrei lam thlengin a awm thin.

Hmun pawimawh leh lun a nih avangin, hnathawh tur pawh a keng tam a, lirtheiin bungrua a phurh thlen thiar leh hlan te, dawrkai te bungraw thiar leh thawh tur awm ang ang te chu sum hmuhna tha tak a tling.

Heng hmun a zing khawvar hma atanga hnathawk tam zawkte chu hnamdang an ni tih ZALEN chuan a hmu a. Zing ni tlang san hma a an sum thawhchhuah pawh a tha thawkhat hman thin tih chung hnathawk hnamdangte chuan ZALEN an hrilh.

Hnamdang an tam zawk tih hian a ram neitu Mizo an awm mang lo tihna erawh a ni lo a, bungraw thiar leh ritphur a thawkah tlem zawk mahse, a bikin commercial vehicle (taxi, two wheeler taxi) khalh, khawvar hma atanga thahnemngai taka thawk chhuak tam tak an awm thung.

Mi tam takte pawm danin, Aizawl hi sumdawnna hmunpui leh a peih leh nachang hriate tan chuan sum lengvak pawh tamna a ni a. Thawh hreh neilo hnamdang leh Mizo tlemte ten, heng hmun kan sawi ringawt atang pawh hian zing khawvar hma in sum an thawkchhuak mek. Thawk peih, nachang hria, Mizo thalai kan chetchhuah tam zel a tul a, a nih loh chuan zawi zawiin kan bu zawl atang ngeiin hnamdangin min la luhchhuah dawn tih hi a chiang !