Aizawl; Mizoram Youth Commission (MYC) in Delhi-a IAS coaching kal tur thalai 20 a thlan chhuah mi pakhata Rs Nuai 2 senna, 'Super 20' te chu MYC in a sponsor hunchhung a zo tawh a, hetihlai hian Covid vanga UPSC prelims 2021 exam neih hun sawn hlat a nih vangin UPSC prelims exam an hmachhawn hma chuan exam dang an hmachhawn thei rih dawn lo.

MYC Chairman, Dr. Vanlaltanpuia hnen atanga ZALEN thudawn danin, MYC in Super 20 te a sponsor chungchang ah MYC in a sponsor chhung leh UPSC prelims 2021 exam an hmachhawn hma chu sawrkar hna dang exam phal a ni lo.

MYC sponsor hunchhung zo tawh mah se, hri vangin UPSC prelims 2021 exam hun sawn hlat niin kumin June kha prelims neih hun tur niin, hemi hma hi Super 20 ten course an zuk neih hun a ni.

MYC Chairman chuan, "UPSC prelims chu kumin October a neih tur a ruahman a nih tak avangin, kumin November a neih tura ruahman State Combined Service exam MPSC-in a buatsaih tur nen a insu buai ta lo," a ti.

"MYC in a sponsor period a zo tawh chungin UPSC prelims exam a la awm lo," MYC Chairman chuan tiin, "Buaina dang a awm a, UPSC prelims hun sawn hlat a nih pawhin exam dang an hmachhawn thei rih dawn lo," a ti a. UPSC prelims an hmachhawn hnuah erawh exam dang an hmachhawn thei tawh dawn niin a sawi.