Aizawl: Covid 19 hlauhna vuakvet-ah Food and Civil Supply dept. chuan nitin ei leh bara a buai loh tur thu an sawi a, PHE pawhin tui lamah theih tawp an chhuah tih an sawi.

Food, Civil Supply & Consumer Affairs Director Dr. Lalhriatzuali, IAS chuan nitin mamawh chi hrang hrang a tam tawk tih Zalen palai a hrilh a. "Buhfai, oil leh nitin mamawh a tam tawk a, kawng lakah engemaw zat a awm a. Lungngaihna tur a awm lo a ni," a ti.

Tui lamah pawh harsatna a awm lo turah PHE thawktute chuan an sawi a, Tlawng atanga tui lakchhuah lam buaipuitu Aizawl Water Transmission Division, Maubawk-a PHE?Executive Engineer, Thanchungnunga chuan, "Khawl lamah harsatna te a thleng thut anih loh chuan tui sawngbawlna hmanrua lamah chuan harsatna kan nei lo ang. Tui sem pawh dan anga kalpui zel a ni dawn a, keini hi essential commodities lam buaipuitu zingah kan tel a, mipui mamawh pe turin theihtawp kan chhuah zel ang," a ti.