Aizawl August 17, 2024 : Vawiin khan FCS&CA Minister B. Lalchhanzova chuan Edenthar veng a Basic Service to Urban Poor (BSUP) a awmte tlawhin mirethei chenna in BSUP-a cheng mek thenkhat NFSA (Card Eng/Card Pawl) a awm ngei tur awm si lo te a tlawh a. BSUP-a cheng zinga Card Var nei an lo la awm chu pawi a tih thu a sawi.

Chhanzova chuan, "Miretheite chanvo/ quota buhfai man lo a sem te mirethei awmkhawmna BSUP-a awmte zingah chang ve lo an awm hi thil pawi tak a ni. BSUP-a chengten hmun hla tak takah ration an khul thin pawh hi an kawtkai ngeia ration an khul theih nan hmalak a ni ang," a ti.

"Card Eng leh Card Pawla awm lo tur awm mek te, Pathian malsawma dawnga dinhmun thaa dingte Card Var-a thiar chhuak turin hmalak mek a ni a, Aizawl Municipal Area-a Card en hat mek hi mipui hmuh theih turin Veng tinah tarchhuah a ni ang a, complaint duhte tan complaint theih hun hawn a ni ang," Supply Minister chuan a ti.