India-a Supreme Court chuan eptu hruaitu, Rahul Gandhi-a chu mi tihhmingchhiat thubuaia thiam loh chantira hremna pek chu a taka kalpui rih lo turin a ti.

Congress hruaitu hi March thla khan kum 2019-a inthlan campaign laia thu a sawinaah Prime Minister Narendra Modi-a hming a lam rik danah Modi tih hming pu dangte tihmingchhiaa puhin hremna pek a ni.

Gandhi-a hi he hremna avang hian MP a nihna pawh hlihsak nghal a ni.

Zirtawpnia court thutlukna hian parliament-a a kir leh theihna kawng a hawnsak bakah nakuma  ram inthlanpui lo awm tur pawh a chuh thei ang.

Parliament rorelna in hniam zawk pisa pawhin Gandhi-a a lo hnawl tawhna chu la kirin MP a ni leh dawn ta a ni.

“Hei hi rang taka tihfel nghal tur chi a ni,” tiin Lok Sabha secretary general lo ni tawh thin, PDT Achary chuan BBC hnenah a sawi a. Gandhi-a chu tuna parliament session neih mek pawh Thawhtanni atanga zawm ve nghal tur a nih thu a sawi bawk.

“An hremna chu a taka kalpui a nih dawn loh chuan nakum inthlanpui pawh a chuh thei nghal tihna a ni,” a ti bawk.

Supreme Court-in thutlukna a siamah hremna petu, trial court judge chuan hremna na ber, kum hnih chhung hremna a pek chu ‘chhan tha tawk awm lo’ a tihsak a ni.

Court hian Gandhi-a hi tuna a thusawi ang chi sawi chhuak leh tawh lo tura fimkhur turin a ti nghal bawk.

Gandhi-a laka mi tihhmingchhiat thubuai hi BJP hruaitu pakhat, Purnesh Modi-a’n a put luh a ni a. Kum 2019-a Karnataka assembly inthlan laia a campaign-naa Congress hruaitu thusawi behchhana a siamsak a ni.

“Engvangin nge rukrute hian Modi-a tih hming hi an put vek mai? Nirav Modi, Lalit Modi, Narendra Modi,” tiin hemi tum hian Gandhi-a hian a sawi.

Nirav Modi-a hi Indian diamond tycoon niin sum a tihchingpen avanga man duh, tlan bo mek niin Lalit Modi-a hi Indian Premier League (IPL) hlui, sum tihchingpen vang bawka India-a cricket board-in a dam chhunga cricket-a inhnamhnawih tawh lo tura a hrem lai a ni.

Complaint a thehluhah Purnesh Modi-a hian he thu sawi hian Modi tih hming pu zawng zawng a tihmingchhia niin a puh a. Gandhi-a erawh chuan tute hnam leh chi bil emaw a sawi lo va, ei rukna a sawi lanna mai a nih thu a sawi ve thung.

Court hniam zawk hian Gandhi-a hi a hrem rualin hremna chu court sang zawka ngaihtuah tha leh tura thlen theihna hun a siamsak a. July thla khan Gujarat High Court-ah kalin hremna tihkhawtlaisak a dil a, hnawl a ni a, court sang berah hian kal lehin a hlawhtling ta a ni.