Aizawl: Prime Minister Narendra Modi chuan khawvel puma hri leng mek, coronavirus chung changah ram mipuite hnena thuchah a sawi thar leh a, ram mipui te chu zanin dar 9:9-ah êng dangte tithima Diya (hluma a siam bati), torchlight leh mobile flashlight-te tieng turin a sawm. Mizoram ah chuan mi tam takin tih hlawhtlin an tum lemlo niin a lang.

Mizoram Kohhran Hruaitute Committee chairman leh Synod Moderator ni bawk Rev. R.Lalchangliana chuan PM ngenna hi kohhran ang chuan an sawiho lo tih sawiin mimal zalenna ah an dah tih kan palai a hrilh a. PM thiltih chu Hindu sakhuana nena inzawm nia a hriat avangin amah chuan tih a tum lemlo niin a sawi bawk.
ZPM MLA Dr. Vanlalthlana chuan party angin engmah sawihona an nei lo tih sawiin eng chhit chu a tum lemlo niin Zalen a hrilh.
BJP Mizoram thu puangtu Hriata Chhangte chuan, "He thil hi Hindu Mythology hrula tih a ni tih hi ka pawm a, Pathian hnena chakna dilna turin Pu Modi-a hian a ti a ni. Kan hriat reng tur chu India rama cheng 80% Hindu an ni a. Hindu mythology-ah chuan eng dang hi chakna lakna a tling lo, chuvangin Diya leh Mombati chhi tur hian min ti a, an pathian Mahashankar koh chhuahna atana ti a ni. Modi-a hian sakhaw tih bikna thila ti a nih ka ring lo, Covid-19 avangin a mangang tak zet a, pathian koh pui turin min duh a ni mai ah ka ngai," a ti.
Eng hi chhit ve a tum leh tum loh a sawinaah Hriata Chhangte chuan, "Ka chhit leh chhit lovin ka rinna a khawih lo, tih hi a ni. Cellphone leh Torchlight an tih chhan kher pawh hi sakhaw dang zui tute tawiawm ve tura a tihna mai niin ka ngai a, rilru lama chak tharna kan neih beiseina atana tih a ni ber," tiin ZALEN zawhna a chhang.