Aizawl: Mizoram kohhran lian ber Presbyterian thuneitu sang Synod inkhawmpui vawi 97-na chu Zirtawpni khan a tiak a, nakum Synod inkhawmpui chu December ni 1-12, 2021 hian Republic veng kohhran biak in ah neih a ni ang.

Synod inkhawmpui hian Mizoram chhungah Pastor bial thar 8 hawn an remti a, chungte chu Luangmual leh tanhril bial atangin Chawlhhmun bial, Bungkawn bial leh Khatla bial atangin Nursery veng bial, Muallungthu bial atangin Melriat bial, Saitual bial atangin Saitual Chhim veng bial, Thenzawl bial atangin Thenzawl Vengthlang bial, Khuangleng bial atangin Khuangleng south bial, Khawbung bial leh Vanzau bial atangin Khawbung Vengpui bial, W.Phaileng leh Rawpuichhip bial atangin W.Phaileng Dinthar veng bial te an ni.

Synod rorel langsar zingah ‘KTP general conference leh Bial KTP Conference Mizo tawnga dah’ chungchang rawtna chu ‘kan kal dan pangngai hi a tha e kan ti,’ an ti a. ‘Synod hospital leiba tihzangkhai nan dan zawhkim tinin Rs.20 thawh’ rawtna chu tha an ti a, SEC bawhzui atan an dah. Covid 19 hripui leng vanga tam lo thleng thei laka ruahmanna Synod-in siam tura rawtna Ramlai Presbytery thu chu, SEC bawhzui tura dah a ni. Synod chuan Kohhran Pavalai Pawl din tan niah July ni 21, 2004 an pawm bawk.

Synod Inkhawmpui hian kum 2021-2022 budget atan Rs. 3,79, 20,14,000 an pawm a, hengte hi Pastoral-ah Rs. 2,42,84,10,000 leh Mission-ah Rs. 1,36,36,04,000 te an ni. Kumin April atanga October inkar chhunga Synod sum hmuh zawng zawng chu Rs. 1,55,96,43,423 a ni.