Aizawl August 26, 2024 : November 6, 2022 atanga Syria rama hnathawka awm tawh, harsatna an tawh avanga Mizo hmeichhe pathumte chu hruai haw tura thla 4 dawn buaipui an nih hnuah Ningani khan Mizoram rawn thlen pui an ni.

Mizoram Police chuan Syria rama mi in-a hnathawk (House maid) Mizo hmeichhe pathumin harsatna an tawh thu leh hruai haw tura hmalak a nih thu an lo puang tawh a. Hmeichhe pathum hruai haw tura hmalatu Mizoram Police hnuaia CID Special Branch-in thla 4 dawn an buaipui hnuah August ni 22 khan Mizoram rawn thlenpui an ni a, Aizawla hmun pakhatah an awm rih a; tunkar chho hian an khaw lamah an haw tura ngaih a ni.

Police hotute chuan in hruai haw tura a kawng a thui zia an sawi a, Syria chu rambuai a nih avangin official in thil bawhzui a harsa hle tihte, an ngen angin Syria, Damascus-a Indian Embassy te'n an buaipui a, Mizo hmeichhia te leh anmahni ruai tute chu Syria-ah hian court ah inkhingin, hmeichhe 3 te hian thiam an chang a, hemi hnu hian Indian Embassy, Damascus in hmeichhe pathum te hi an enkawl a, Exit Visa te an buaipui fel hnuah August ni 20 khan Syria hi an chhuahsana, hemi ni vek hian India an rawn thleng a ni.

Hmeichhe pathum te hi E&K Agency, Vaivakawn te'n ram pawna an thawn chhuah a ni a. Agency te hian Dubai-ah hnathawk turin an thawn a, thla 4 dawn hnathawh tur hmuh loh avangin anmahni enkawltu Dubai-a Agency te chuan an duh lo chung Irag ah thawn an tum a, chumi lamah chuan an kal tura ngaih a nih laiin Syria ah tirh an ni a, November ni 6, 2022 khan Syria hi an thleng a ni.

Mizo hmeichhia te hi Syria-ah chuan mi in ah awm in House maid hna an thawk a, mi pakhat mai ni lo in hrang hrangah hnathawkin tirh kual an ni a. Anmahni chhawrtute hian zing hma tak atanga chhawr tanin, zan lamah pawh hun rei lote bak mutna hun an pe lo a, ei tur mumal an pe thin lo bawk.