Taliban chuan thihchilhtu tur pawl, suicide bomber battalion an siam dawn a, heng mite hi Afghanistan ramri, a bikin Badakhshan province velah an dah dawn nia sawi a ni.

Hmarchhak lama Badakhshan province Deputy Governor Mullah Nisar Ahmad Ahmadi chuan chanchinbumite hnenah suicide bomber battalion  an din tur hi Tajikistan leh China nena an inrina laiah an dah dawn niin a sawi tih Khaama Press chuan a sawi.

Ahmadi chuan battalion hi Lashkar-e-Mansoori (‘Mansoor army’) tiin a hming an vuah dawn a, ramri-ah an dah dawn niin a sawi.

An battalion din tur hi Afghan sorkar an paih thlak taka venhim hna thawktute bei thintute ang bawka an chet tur thu a sawi bawk.

“Khatiang pawl kha awm lo sela chuan United States kha hneh mi rual a ni lo. Khang mi huaisente khan waistcoat-ah puak thei an pai am Afghanistan-a US luah hmunah te an tipuak a. Hetiang mite hi hlauh nei lo, Allah tana inpe an ni,” tiin Ahmadi chuan a sawi niin Khaama Press chuan a tar lang.

Lashkar-e-Mansoori an tih bakah hian Badri 313 an tih chu battalion dang, tun lai sipai hmanraw tha leh changkang ber bera thuam an awm bawk a. Heng mite hi Kabul International Airport-a dah an ni ve thung.

Badri 313-a telte pawh hi thihchilha bomb tipuaktu tura inpe thote an ni tih Khaama Press chuan a tar lang.