Mizoram Board of School Education chuan Ningani kalta khan matric result a tichhuak ta a, a pumpuiah 67.93% in an pass a, nikum aiin kuminah hian pass percentage hi a chhe zawk a, nikum aia kumina a tlakhniamna hi 8.72% a ni a, a sang zawng ni lova a hniam zawnga a kal chhan hi chhui a tha khawp mai.
Kumin HSLC ah hian zirlai 17,346 an exam a, hengte hi mipa 8328 leh hmeichhia 9018 an ni a, matric ah hian mipa aiin hmeichhia an tam deuh zel mai a. Hei hi enge a chhan ni ang? Hospital record ah chuan kumtin naupiang ah hmeichhia aiin mipa an tam zawk deuh zel a, mahse heti chunga HSLC-ah mipa aia hmeichhia an tam zawk tlat mai hi a mak a. Hmeichhiate hian zirna an ngai pawimawh zawk tihna a entir thei awm e.
Thil danglam deuh mai kumin a thleng leh chu top 10 ah hnamdang an lang lo hi a ni awm e. HSLC result chhuakah hian top 10 ah hnamdang engemaw zat an lan thin mai piah lamah topper hial te pawh an hauh thin a, kumin ah erawh an lang lo hi thil lawmawm tak a ni a. Mizo thalaite an harhthar ta a tih theih a, hmasawnna chhinchhiah tlak tak a ni awm e. Kumdang ang bawkin kuminah pawh hian sawrkar school aiin private school ten an titha leh zawk a, hei hi inenfiah a ngai khawp mai. Sawrkar school a zirtirtute hi hlawh tha zawk leh training pawh nei tha zawk an ni a, kumtin deuhthawa an tichhe tlat mai hi a chhan zawnchhuah a pawimawh hle.
Matric pass thar ten an tihsual fo thin chu an kalna leh tuina kawng an hre fuh tawk thin lo hi a ni. Mi tam tak chu matric ah an pass that mai avangin an tuizawng ni miah lo Science leh Commerce subject te an la ngawt thin a, hei hian beidawnna a thlen fo tih hriain mahni tuizawng subject thlan thiam a pawimawh hle.
India rama hnasang leh central service ah te Mizote kan lang ngai ta mang lo hial mai. Chuvangin thalai rilru chak te hian tumruhna nen dinhmun sang zawk chelh tura ruahmanna an siam a pawimawh ta hle mai. Tun ang zela kan kal chuan hun reilote ah kan rama hnasang leh dinhmun pawimawh hi hnamdangin an chelh vek mai dawn a, chuvangin tumruhna leh huaisenna nen matric pass thar te hian tan han la sauh sauh teh se.