Aizawl May 27, 2023 : Mizoram Pradesh Congress Committee (MPCC) Campaign Committee ruahmannain, Congress Thalai Hqrs. chuan tukin khan Aizawl Tennis Court kiangah 'That loh theih lohna Sawrkar tha, kalphung dik nei tura beihpui thlakna Street Campaign 2023' bul tanna an nei a. MPCC Treasurer Dr. Lalmalsawma Nghaka chuan, Tang Puihna 'policy' hmangin mellung thar an kai dawn niin a sawi.

MPCC Teasurer chuan, "Congress Party hian Tang Puihna 'policy' hmangin mellung thar kan kai dawn a, 'kan ti ang' kan tih chu ti hlawhtling thin kan ni," a ti a. Dikna leh rinawmna hmanga kan ram tungding leh turin Congress Party chuan kum 2023 Inthlanpuiah hnehna an chan ngei tur thu a sawi. Dr. Lalmalsawma chuan, "Remna leh muanna a thlen theih nana Chief Minister nihna kiantu Party chu Mizo mipuite tâna ding tlat a ni thin," a ti bawk a.

Mahila President Vanlalawmpuii Chawngthu chuan Congress Party chu hmeichhiate dinhmun chawisanna kawngah sulsutu a nih thin niin sawi a. Ex-Minister chuan hmeichhiate dikna chanvo ngaihthah lotu leh humhalhtu party chu Mizo hmeichhiaten chawisang let ve turin a chah a ni. Tang Puihna hmanga mipui puih turte chu a taka a thlen leh dawn avangin he 'policy' hi belchiang turin a chah bawk.

AMC Corporator leh MPCC Secretary  Rosiamngheta pawhin thu sawiin, Politics-ah chanchin hmasa zirchian a tul hle tih a sawi a. Party dang lo sutkuak tawhte leh kan ram tana nasa taka an lo thawhte sawichhiaa lal thutthleng luah tum chu a malsawm ngai lo, a ti.

Congress-in hmasawnna tam tak an lo thlen tawha a aia nasa zawk thlena rorelna dik thlen leh turin kum 2023-ah, thlang leh theuh turin a chah a. Kuthnathawktu mai ni lovin, an thawhchhuah leitu mipuite thlengin Tang Puihna hmanga dawm  an tum tih a sawi bawk.