Aizawl: Covid 19 vanga state dang atanga Mizoram haw tur leh Mizoram atanga state danga haw tur te chu an haw zo thawkhat tawhah sawrkar chuan a ngai.

Zalen in Task group on migrant workers & stranded travellers hnen atanga thu a dawn danin tun dinhmunah chuan a hlawmpuia lo haw tur ang chi kha an awm tawh lo a, lo haw tur te pawh a zeuh zeuh in an lo haw a. Mizoram atanga mahni ram/state a haw tur te pawh an haw zo thawkhat tawh niin an sawi. Chhianchhiah danin state/ram dang atangin mi 13081 chu Mizoramah an lo haw tawh a, tun dinhmunah lo la haw tur hi mi 1000 chuang deuh an awm a, heng zinga thenkhat hi kawng laka thang mek an ni a, thenkhat chu hna thil avang leh zirna avanga lo la haw thei lo te an nih avangin a zeuh zeuha lo haw tih loh chu buaipui lutuk tur an awm tawh lo. Mizorama lo haw zat chhinchhiah ah hian Task group on migrant workers & stranded travellers leh district hrang hrang DC te chhinchhiah danah in millo a awm thin a, hei hi a chhan chu Task group on migrant workers & stranded travellers hian an hnena in report te chauh an chhinchhiah laiin DC lam chuan haw zawng zawng an chhinchhiah avangin DC te record hi a tam zawk thin a ni.

Task group on migrant workers & stranded travellers chhinchhiah danin mimala lo haw tiam lovin Mizoram lo haw hi trip 370 an awm tawh a, India ram chhung atang chuan a zeuh zeuhin an lo haw tawh dawn a. India ram pawna Mizo tangkhang zingah July ni 13, 2020 hian Singapore atangin hnathawka awm mi engemaw zat chu Delhi an lo thlen beisei a ni a. A bak a hlawma awm deuh UAE leh Kuwait vela mi chu an chungchang Mizoram sawrkarin Union Home Ministry ah a thlen tawh a, mahse sawrkar laipui (Ministry of External Affairs) in ruahmanna a siam phawt a ngai nia thudawn a ni.

Hetih lai hian Mizoram atanga haw tur te chu an haw zo thawkhat tawh a, Zirtawpni thleng khan Mizoram atanga haw tawh zat mi 2838 chhinchhiah an ni a, nimin lamah Assam a haw tur mi 14 te haw tir leh tum an ni. Tun dinhmunah Myanmar a haw tum mi 48 tih loh chu an haw vek tawh nia thudawn a ni. Mizoram atanga haw zing-ah hian Jharkhand state a haw an tam ber a, chhinchhiah danin mi 1451 an haw a, heng mite hi Mizoram hmun hrang hranga hnathawka awm te an ni. Task group on migrant workers & stranded travellers thawktu te chuan Jharkhand mi leh sa haw te hian Mizoram lo let leh an duh a, mahse a rem hrih loh avangin phalna an la pe lo niin Zalen an hrilh bawk.