Aizawl: Nimin zing khan Zoram Poultry Development Society hnuaia INDBRO Poultry Hatchery Farm, Ramrikawn, Tan-hril, Aizawl hmalakna a ‘Poultry Value Development in Mizoram’ tlangzarhna leh arte district hrang hranga Mother/Brooding Unit a thawnchhuahna hun neih a ni a, AH&Vety Minister Dr K Beichhua chu khuallian a ni.

Dr. K Beichhua chuan Animal Husbandry & Veterinary Department-a thawktute chu Mizoramin sa leh artui a kan intodelh nan tan la chhunzawm zel turin a chah a, hmasawnna thleng tur chuan kalphung pangai piah lam a thil thar ngaihtuah chhuah a pawimawh thu a sawi. Minister chuan Poultry Value Chain Development chu kan ram mamawh tawk arsa tharchhuah kawnga hmanraw tangkai tak ni turin duhsakna a hlan a, department a thawktuten an kalpui zelnaah leh enkawl chhunzawmnaah pawh ram leh mipuiten a hlawkna an hmuh thuai theih nan tha thlah lova thahnemngai taka thawk turin a fuih bawk a ni.

INDBRO Poultry Hatchery Farm, Ramrikawn, Tanhrilah hian a ruala artui 60,000 awp tir theihna Hatchery building a awm a, Layer 6000 emaw broiler 3000 parent stock awm theihna Layer House awm bawk in ar 4000 dang vulh theihna tur sak belh mek a ni bawk. Kum 2019 January-September thleng khan artui 2,44,906 leh arte 1,47,199 tharchhuah tawh a ni.