November 15, 2022; October ni 29, 2022, Inrinni tlai dar 6 rik hma deuh a Tuirial Airfield peng bul a tuialhthei phur (tank lorry) kang a hliam tuar zinga mi, Thangchungnunga (16) S/o TK. Liana, Sesawng field veng chu vawiin chawhma dar 11:20 khan ZMC ah a boral a, hemi nen hian tanker kang a thi zat chu mi 12 an tling tawh. Vawiin a boral Thanchungnunga unaupa Sawimuanthanga (22) chu November 9 khan a hliam tuarlo in a lo boral tawh bawk.

Tarlan tawh angin, October ni 29, Inrinni tlai dar 2:30 vel khan Tuirial Airfield peng bulah tuialhthei phur chesualin, zan dar 6 rik hma deuhin a kang a, a hmun mi 4 an kang hlum a. Tank Lorry bakah taxi pakhat leh scooter (scooty) pathum a kang chhe vek bawk. A hmun a thi te bakah hian vawiin thlengin damdawiin a enkawl hliam tuar mi 8 an boral tawh a ni. 

ZALEN thudawn danin, tun thlengin tanker kang vanga hliam tuar damdawiin a enkawl mi 6 an la awm a, hliam tuar pakhat, Tuirial Airfield mi chuan damdawiin a chhuahsan tawh thung.

Vawiin a a hliam tuar lo a ZMC a boral Thangchungnunga (16) hi zaninah lumen a ni ang a, ruahmanna siam a nih dan chuan naktuk chawhma dar 11 ah vui a ni ang.

Vawin a boral Thangchungnunga unaupa Sawimuanthanga chu kar kalta November ni 9, zan dar 7:30 khan ZMC ah a hliam tuarlo in a lo boral tawh bawk a, thudawn danin, an unau hian Tuirial Airfield a Panhnah la a kal an ni a, a nau Thangchungnunga chu tanker kangah hian a tang a, chumi a chhanna lamah chuan an unauin hliam na tak an tuar a, damdawiin a lak an nih hnuah an hliam tuarlo in an boral ve ve a ni.