Tanker kang a thi mi 9 an tling tawh; hliam tuarte damdawiin ah la enkawl zel

November 8, 2022; October 29, Inrinni tlai dar 6 rik hma deuh a Tuirial Airfield peng bul a tuialhthei phur (tank lorry) kang vang a thi zat chu mi 9 an tling tawh a, hliam tuar thenkhatte chu damdawiin ah enkawl mek zel an la ni.

Tarlan tawh angin, thla liam ta October ni 29, tlai dar 2:30 vel khan Tuirial Airfield peng bulah tuialhthei phur chesualin, zan dar 6 rik hma deuhin a kang a, a hmunah mi pali an kang hlum a. Tank lorry bakah taxi pakhat leh scooter (scooty) pathum a kang chhe vek bawk. Tank lorry kang avang hian mi 15 an hliam a, damdawi-inah lak nghal an ni.

Tuirial Branch YMA hruaitute hnen atanga ZALEN thudawn dain, tukin dar 8:30 khan hliam tuar zing a mi, William Gouminlun (23), Tuirial chu a hliam tuar loin a boral veleh a, vawiin chawhnu dar 1 khan vui a ni. Vawiin thlengin hliam tuar zing a mi damdawiin a enkawl mi 5 an boral tawh a, dinhmun tha vaklo te pawh an la awm nia thudawn a ni.

October 29, 2022-a tank lorry chesual kha a lian chi a ni a, Ramsanga Filling Station, Champhaia dah tur petrol litre 22,000 phur a ni. Petrol a phurh chu cheng nuai 20 vel man a ni a, tank lorry chu a la thar avangin cheng nuai 35-40 man vela chhut a ni bawk.

Petrol pump neitu inzawmkhawm pawl, All Mizoram Petroleum Dealers' Association (AMPEDA ) chuan, October ni 31, 2022 khan Aizawl Press Club-ah thuthar thehdarhtute kawmin, an president K Lalnghakliana chuan, October 29, 2022-a Tuirial Airfield Venga tank lorry chesual a
kan avanga vanduaina thleng chu pawi an tih thu an sawi a, tuialhthei phur lirthei a chetsual chang a awm leh thei tih sawiin, chu'ng hunah chuan tuialhtheite dawh tawh lo turin mipuite an chah.

Tanker kang a boralte:

29.10.22 : INRINNI

1. Rohlira - 74, Tuirial

2. Sangremzovi - 36, Tuirial

3. Lalnunhlima - 36, Thingsulthliah

4. Denis Lalthianghlima - 29, Lamherh

2.11.2022 : NILAINI

5. Moses Lalrintluanga -37 Tuirial

6. Tlangrosiama - 41, Airfield

3.11.22 : NINGANI
7. Lalrinchhana - 23, Sihphir

6.11.22 : PATHIANNI

8. Lalawmpuia - 25 Thingsulthliah Tlangnuam