November 15, 2022; Tuirial Airfield a tuialhthei phur (tank lorry) chesual a kang zui ta chungchang a mawhphurtu TBC Lallawmawma (28) s/o Lalremliana(L), Tuirial chu police ten an man tawh a,  Police te hma a a inpuan danin, petrol thal tuma a kal chu mipui an tam avangin a duh anga a thal ve theih loh thu leh, chumi vanga a thinrim thu a sawi a, a thal sa bottle -a a ken lai chu lighter hmanga a kan theih leh theih loh a hal chhin thu leh, chumi petrol kang chu leiah a paih a, chumi chuan kangmei kha a thlen tak thu a sawi.

Hemi hnu hian TBC Lallawmawma hi an inah tlan hawin a thil tihsual vanga mi an kan hlum thu leh mi tam tak an hliam thute a hriat hnuah a hrehawm tiin inawhhlum a tum a, a nupui leh a thianpain an chhanchhuak nghe nghe a ni. 

Police thuchhuah tarlan danin, ni 25.10.2022, dar 4:35 pm khan Tank Lorry, Petrol litre 22,000, Champhai-a dah tur phur chu Tuirial Airfield area-ah a chesual a. Kawngpuiah tluin petrol pawh nasa takin kawngpui velah a bua a ni. He petrol bua hi dawh/thalin mipui an pung khawm nghal a. Vanduaithlak takin tlai dar 5:50 vel khan petrol bua hi kangin a hmunah mi pali an kang hlum nghal a ni. Mi 17 in hliam tuarin damdawiin hmun hrang hrangah kalpui an ni.

Police leh Fire Department pawh rang takin a hmunah thlengin, kang hi thelh mih a ni a. FSL team ten thil thlenna hmun hi uluk takin an endik bawk. A tirah hian chetsualna hi lirthei khalhtu fimkhur loh vang leh inthlahdah vang niin, mipuiin petrol bua an ruh lai hian mipui zinga tuin emaw mei zuk tuma lighter talhin kangmei rapthlak tak hi a chhuak ta nia ngaih a ni.

He thil hi Bawngkawn Police te chuan chik takin an chhui zui nghal a. Tuirial Veng tleirawl pakhatin mi pakhat, kawngpuia lighter chhi alh a, Tuirial lam pana tlanchhe ta a hmuh thu source rintlak tak atangin dawn a ni a. A hmutu nia sawi hi zawng chhuakin ngun taka thu zawh a ni a, Tuirial YMA hruaitute puihnain pawikhawihtu ni ngeia rin TBC Lallawmawma (28) s/o Lalremliana(L), Tuirial chu ni 1.11.2022 khan zawn chhuah a man a ni a. Police-ten ngun taka thu an zawh fiah hnuah a tuk, ni 2.11.2022 zing dar 11:00  khan a inpuang a. 

TBC Lallawmawma hian a inpuannaah petrol thal tuma a kal chu mipui an tam avangin a duh anga a thal ve theih loh thu leh, chumi vanga a thinrim thu a sawi a, a thal sa bottle -a a ken lai chu lighter hmanga a kan theih leh theih loh a hal chhin thu leh, chumi petrol kang chu leiah a paih a, chumi chuan kangmei kha a thlen tak thu a sawi a ni. Hemi hnu hian TBC Lallawmawma hi an inah tlan hawin a thil tihsual vanga mi an kan hlum thu leh mi tam tak an hliam thute a hriat hnuah a hrehawm tiin inawhhlum a tum a, a nupui leh a thianpain an chhanchhuak nghe nghe a ni.

Pawikhawihtu hi man a ni a, Judicial Custody-ah ni 3.11.2022 khan hruai niin, Bawngkawn PS C/No 810/22 dt 31.10.22 u/s 279/285/ 304A/336/337/338/435 IPC r/w 184 MV Act ziah luh a, thubuai siamsak a ni.