Aizawl: Taxation department chuan kum kalta 2019-2020 chhunga an target sawrkarin a bituk chu vbc 145 in an khum. Hetih lai hian VAT bikah erawh chuan target hi an hmu phak lo a, hei hi a chhan ber chu zu zawrh tihtawp vang a ni.

Zalen in Taxation department thawk tu te hnen atanga thu a dawn danin sawrkarin kum 2019-2020 chhung a target an siam chu Rs. 5,21,79,06,000 niin department in an hmuh chu Rs. 6,67,28,72,503 a ni a, an target hi Rs. 1,45,49,66,503 in an khum a ni.

Goods & Services Tax bikah sawrkarin target a siam chu Rs. vbc. 355 niin an hmuh chu Rs. 5,31,98,06,155 a ni a, target an khumna hi Rs. 1,76,98,06,155 a ni a. Professional tax ah target vbc.16.7 anih laiin Rs. 17,47,69,967 hmuin Rs. 77,69,967 in an khum a. Hei bakah hian Taxes and duties on commodities and serives ah Rs. 1,13,374 an hmu a, Registration & License fee ah Rs. 5,99,790 hmuin target Rs. 2,93,790 in an khum a ni.

Hetih lai hian Tax on Sales, Trade etc. (VAT tia hriat thin) ah erawh an target an phak lo thung a, sawrkarin target Rs. 1,50,06,00,000 a tuk ah Rs. 1,17,75,83,217 hmuin target hi Rs. 32,30,16,783 in an phak lo a ni. VAT a target an phak loh chhan hi sawrkarin zu zawrh a tih tawp vang niin Taxation hotute chuan an sawi a, kum kalta ah hi chuan petrol leh diesel ah chauh VAT an lak avangin an target hi an phak lo niin an sawi.

Taxation department thawktu te chuan GST chu Mizoram in a hlawkpui hle niin an sawi a. "GST hman anih hma kha chuan central sales tax ah 2% kan pe thin a, chu chu a siamchhuaktu state chan a ni a. Mahse GST hnuah chuan chhiah lut zawng zawng hi sawrkar laipui leh state ten a inzat (50:50) in kan insem a, keini ang state tan chuan a manhla hle a ni," an ti. India ramah lockdown kalpui anih avangin chhiah hmuh pawh nasa takin a tlahniam dawn niin Zalen an hrilh a. "Industry leh factory te hnathawk thei lovin an awm a. Kan sumdawng ten bungrua an lalut tlemin an hralh tlem bawk a. Hei bakah contract hnathawh theih a nih loh bawk avangin kan sum hmuh hi nasa takin a hniam phah thei dawn a ni," an ti bawk.