Wimbledon khelh mekah nizan khan Rafael Nadal chu quarter-final a khelh laiin a inhliam a, chhel taka game khel tluan luiin harsa tak chunga Taylor Fritz hnehin semi-final a lut. 

Spaniard hian set hnihna tawp lamah medical timeout lak ngai khawpin a taksaah hliam a nei a, huaisen taka khelh zawmin theih tawp a chhuah zui zarah harsa takin 3-6 7-5 3-6 7-5 7-6 (10-4) in hnehna a chang hram.

Frence Open champion hlim Nadal-a tan Grand Slam dang lakna hun tha a rawn inhawng leh mek a, semi-final ah Nick Kyrgios a hmachhawn ang.

A match khelh hnuhnung berah Nadal hian a dulthuar a ti na a, chu na chu rawn chhuak lehin hun rei vak lo chu a chawlh a ngaih leh phah nghe nghe a ni.

Kum 36 mi Nadal chuan a hliam dan chungchang sawiin,"Ka nat dan chiah pawh hi ka sawi thiam lo. Ka taksa hi chu a dam tha khawp mai, mahse ka dulthuar velah hian eng emaw nuam lo lai a awm a, ka inkhelh tibuai lutuk lo mah se service hi a harsa em em a ni. Match kha ka khelh tluan theih loh mai ka ring hman tawh a, mahse entu mipui khan chakna thar min pein ka khel tluan thei a, an chungah ka lawm hle a ni," a ti. 

Grand Slam vawi 22 champion tawh Spanish hi an inkhelh laklawh lai set hnihna 3-4 a nih mek laiin a hliam vangin enkawl a ngai a, hun eng emaw chen an chawlh hnuah rawn khel lehin set a rawn la leh thei. 

A khel dan phungah harsatna a nei em emin a hriat loh a, backhand leh service-ah erawh harsatna a nei tih a hriat thung. A tumpui pa aiin Nadal hian 25mph velin a service muang zawk bawk.