Aizawl April 6, 2024 : TBC Car Rental chuan tun hnaia All Mizoram Car Rental Association (AMCRA)-in an puh chhiatna chu ‘a dik lo a ni’ tiin ngaihdam dil an phut.

TBC Car Rental neitu, TBC Lalthatluanga chuan thuchhuah siamin anmahni chu sawrkarin ‘Rent-a-Cab Scheme’ hnuaia dan leh hrai a siam zawm kim a, dik taka license a pek hmasak ber an ni tih sawiin India president, Prime Minister leh Union Minister etc. te an lo kalin hman thin an ni a ti a. MP inthlan lo awm tura anmahni motor chauh hmang anga AMCRA-in an puh chu a dik lo tih sawiin an motor 11 chauh an hman laiin AMCRA-a tel, RR Car Rental chuan an pek aia tam tun inthlanah hian motor an pe niin a sawi a. AMCRA-in election official zawng zawng motor pe vek anga ngaih theih tura an puhna chu a dik lo tih an sawi bawk.

“Lirthei hman chungchangah Adviser to CM, TBC Lalvenchhunga (MLA) chuan inhnamhnawihna pakhat mah a nei lo a, election observer-te motor kan pe tih pawh hi a hre lo a ni,” an ti a. Car rental hmang duh te hian State Transport Authority (STA)-in a pawmpui car rental zing atangin an duh hmang turin zalenna an nei tih an tar lang bawk a. TBC Car Rental chu AMCRA dintute zinga mi niin a meizanghlaptu ber an ni thin a; mahse, AMCRA member zingah dan zawm lo an awm thin avanga chhuahsan ta an ni tih an sawi bawk.