Aizawl April 8, 2024 : Vawiin khan ZPM chuan Party Office-ah chhung inkhawm hun an hmang a, he huna thusawitu Adviser to Chief Minister Lalmuanpuia Punte chuan na takin TBC Lalvenchhunga thlavang a hauh a, a tawp thlen an tum thu a sawi.

Lalmuanpuia Punte chuan “Tun hnaiah kan thawhpui TBC Lalvenchhunga, Chief Minister Adviser (Finance) dawt ngialngan hmanga an puh hi a thinrim thlak hle a, hetiang dawt hmanga inpuhna leh intihhmingchhiatna hi a chhanletna kan hmu thuai dawn a, an phu tawk hremna an hmu ngei turah kan ngai a, a tawp thlen kan tum a ni,” a ti.

Adviser to Chief Minister Muanpuia Punte chuan, “TBC Car Rental chungchangah kan MLA hian inrawlhna pakhatmah a nei lova, a hriatpui hek lo. Hetiang dawt hmanga inpuhna leh intihhmingchhiatna hi a chhanletna kan hmu thuai dawn a, an phu tawk hremna an hmu ngei turah kan ngai. A tawp thlen kan tum a, Court-in a chingfel thuai dawn a ni,” a ti bawk.

District council chungchang sawiin Muanpuia chuan, “Autonomous District Council chungchangah sawrkar kal tawhte an inrawlh nasa thin a, keini erawh chuan kan Party ni lo mah se, phehthluk tumin kan veh ve dawn lo tih kan Chief Minister-in a sawi tawh a, 'Tha takin sawrkar ula kan pui mai ang che u. politics bawlhhlawh hi keini ZPM chuan kan tih a rem ve lo. Inharsatna a piangah kan pui ang che u. Amaherawhchu Corruption case-ah erawh ZPM MDC pawh ni ula kan dim dawn lo che u,” tih thu a sawi tawh a ni.

CM adviser chuan, "Hemi hnu lawkah Chakma Autonomous District Council-in harsatna an tawk a, ZPM-a rawn luh tum mah se, a changtu District Council Affairs Minister chuan an ZPM tak tak a rin loh avangin ZPM-a inpek a rem loh thu a hrilh hial a, ADC-a ZPM hawiher chu hei hi a ni” a ti bawk.