Aizawl : India khawpui hrang hranga Mizo tangkhangte hruai haw hna kalpui mekah vawiin hian Telengana atanga rawn haw te chuan Mizoram an rawn thleng dawn a, naktukah hian Bangalore atangin Karnataka state chhunga tangkhang mi 1505 ten Mizoram an rawn pan ve thung ang.

Tunkar chho hian hriat theih chinah Andra Pradesh leh Kerela state a tangkhang zingah Mizoram rawn pan tur an an awm a, mimal anga rawn haw hi an awm ve reng bawk. Hriat theih chinah Andra Pradesh atanga rawn haw tur hi Aizawl district-ah mi 28 an ni a, Kerela atang hian mi 128 an rawn haw dawn a, Telengana lam hi an zat chiah an la hriat loh thu DC Office lam chuan an sawi.

Karnataka atanga rawn haw tur te hi sawi tawh ang khian mi 1505 an ni a, anni hian zing dar 7 atangin screening an nei tan dawn a, chuvangin an rawn chhuah hun tur chiah hi hriat theih a la ni lo. Bangalore Mizo Association president Laldingliana Tlau Vantawl (Patea) chuan, "Haw tura in report kan dawn chu 1505 an ni a, kan kal vek dawn em tih chu hriattheih a la ni lo. Screening neih chhung hi a rei dawn a, chuvangin kan rawn chhuah hun tur chiah hi hriat theih an la ni lo," tiin ZALEN a hrilh.

State dang atanga rawn haw hrim hrim te hi R. Dengthuma Multipurpose Centre, Mualpui-ah RAT test neih pui vek an ni ang a, chumi hnuah an awmna veng, khua leh district-ah te quarantine tura chhuah chauh tur an ni.