ZALEN February 3, 2025 : Lalnghinglova Hmar, Aizawl West-II bialtu MLA chuan tunhnaia Aizawl West-II bial huam chhunga ZPM Local Council Candidate-te inhmuhkhawmna, January 27, 2025, Vaivakawn YMA Conference Centre-a a thusawi chuan Model Code Of Conduct a kalh loh thu a sawi.

ZPM Party chhung inkhawmah Tetea Hmar chuan, “Local Council inthlan lo awm tur atana ZPM Party candidate te inhmuhkhawmna ah hian party mi ka nih angin keipawh sawm ka ni a, thu pawh ka sawi ngei a ni. Mizoram Sawrkarin Aizawl West –II bial tana a hmalak tawhna te sawiin, SASCI Part-III hnuaia Aizawl West Outlet Project, Motor kawng siamna tur Mizoram Sawrkarin a ruahman fel tawh thu leh hemi atana sum pawh min pek tawh thu ka sawi a, administrative Approval pawh hmuh vek tawh a ni.

"Tin Vaivakawn Market sak thatna tur Mizoram Sawrkarin a ruahman fel vek tawh January ni 7-a State Level Committe On SASCI in Local Council inthlan a puan hmaa a pawm fel vek tawh a ni a, vantlang hmuh theih turin I&PR Website ah he mi ni vek tlai Dar 5:00 pm ah dah chhuah vek a ni tawh bawk. Heng thilte hi Porject thar a ni lo a, Sawrkar hmalak tawhna a lawmawm kan tih em vanga I&PR te pawhina an tarchhuah tawh kan han sawi nawn ve leh mai a ni a. A lawmawm tehlul nen mithenkhat chuan State Election Commission ah MCC bawhchhia tiin min hek ta a ni,” a ti.

Aizawl West –II Bialtu MLA chuan, “Model Code Of Conduct chuan, inthlan atana Vote duh vanga hmalakna thar puan a remti lo a, hemi hi hre reng chungin ka thusawina ah pawh Sawrkar hmalakna thar tur sawi chakawm tak takte pawh kan insum zawk a ni. Heng ka thusawite erawh hi chu sawrkar hmalak tawhna a ni a, veng chhung leh Bial chhung bakah Aizawl khawpui tan leh Mizoram tan pawha sawrkar hmalak tawhna thu lawmawm vantlang hriata tarlan tawh, kan han sawi chhuah ve leh te pawh inhek nan min hmang duh ta mai hi, mipuite lawmnaah hian Party thenkhat chu an lawm ve lo niin ka hria ni,” a ti bawk.