ZALEN, May 06, 2025: Sports Minister Lalnghinglova (Tetea) Hmar chuan a bial chhunga tun hnaia Mizoram Board of School Education-in HSLC result a tihchhuaha Top 10-a lang pahnih leh MPSC Combined Competitive Examination 2024 a hlawhtlinna chang pathumte hnenah lawmpuina a hlan.

Aizawl West II bialtu hian a biala HSLC Top 10-a lang pahnih, 7-na Arza Lalawmpuii, Dawrpui Vengthar, St Paul’s HSS leh 9-na, Steven Lalawmpuia, Kanan Veng, St. Joseph HSS te hnenah lawmpuina thuziak (memento) leh laptop a hlan.

MPSC Combined Competitive Exam a tling thar pathum - C. Lalchhandami, Kanan Veng (8th, MCS); Lalhruaizela, Dinthar (15th, MCS) leh Andrew Laldosanga Ralte Rengci, Kanan veng (33rd, MPS) te hnenah memento leh Rs. 20,000 theuh a hlan bawk.

A office chamber-a hun hmanah hian Tetea chuan HSLC-a hlawhtlinna changte chu an bul tanna chauh a nih thu leh pen khata hma sawnin, a lehpek a la awm tih hrilhin an kal zelna turah duhsakna a hlan.

MPSC Combined Competitive Exam a tling tharte chu an thawhrim rah an seng tih hrilhin phaia an kala All India Services leh Central Services-ah Mizo dawr tur an awm thin lo chu rualawh a na tih a sawi a, “A tumna kan neih chuan a tluk a awm lo,” tiin a fuih a. An hna tharah pawh rinawm leh dik taka thahnemngaia taka thawk turin a chah.