ZALEN May 29, 2025 : MZP General Headquarters Executive Meeting vawi 643 na chu MZP Conference Hall-ah neih a ni a. MZP rorelna sang ber dawttu Federal council sitting vawi 58-na Agenda rorel bawhzui dan tur, Phuldungsei khua (Thaidawr tlang) a thil thleng chungchang leh pawl chhung thil pawimawh rel a ni.

Meeting hi MZP President H. Lalthianghlima chuan a kaihruai a ni. MZP chuan, "Mizoram chhung Phuldungsei khua Thaidawr tlang pan chhohna kawng sira, Tripura sawrkarin Forest Guest House an sak mek, tu tih hriat loh te'n ni May 28, 2025 zing dar 2-3 inkara bomb hmanga an beih chungchang a ngaihtuah a. Hetianga mi tu tih hriat loh te'n bomb hmanga Mizoram chhung an bei hi MZP chuan pawi a tiin a dem hle a, he thil thlenna hmun hi Mizoram chhung anih avangin, Mizoram sawrkar thuneitute'n a rang lama thil thlen dan chhui tur leh Tripura sawrkarin Forest Guest House an rawn sak mek hi remchanga laa titawp nghal turin a ngen a. Thaidawr tlang pannaah hian Mizoram Police duty dah ve nghal turin sawrkar thuneitute a ngen a ni," a ti.

Mizoram chhunga Tripura sawrkar-in Forest Guest House a sa leh, a bul lawkah Tripura State Rifle te an duty reng laia beih a ni hian, Mizoram state puh hmingchhiatna tura thiam taka ruahman a ni ang em tih MZP hian a ngaihtuah a. Phuldungsei mipuite ti thlabartu leh Mizoram mualphona thlen thei thil thlen dan hi chhui chhuak vat turin MZP chuan Mizoram sawrkar a ngen a ni.

MZP chuan, Thaidawr tlang chhehvela Tripura sawrkarin kut an rawn thlak reng chu a ngaimawh a, April 16, 2025 (Nilaini) khan MZP President H. Lalthianghlima hovin helai hmun hi an lo tlawh tawh a. Tripura sawrkar hmalakna chu a rang thei ang bera chawlhsan turin an lo hrilh tawh a ni.