Aizawl December 29, 2022: I&PR minister Lalruatkima chuan, "Thalai tlem a zawng nunkawng dik lo zawh te avangin thalai zawng zawng chhe ta vek ang thaw thanga kan sawi thin hi a dik lo a. Mizo thalai fel tak tak, mahni kalna zawna taima tak tak thahnem tak an awm," a ti.

December 30, 2022, Zirtawpni-a Tuikual Field-a Futsal ground-a astro turf (phul lem) phah tur a hova an enho naah Lalruatkima chuan, "Kan Chief Minister zahawm tak Pu Zoramthanga kaihhruai sawrkar chuan kawng hrang hrangin hmasawnna ruhrel siam kawngah hma a la mek zel a. Kan thalai tlem a zawng nunkawng dik lo zawhte avangin thalai zawng zawng chhe ta vek ang thaw thanga kan sawi thin hi a dik lo a. Mizo thalai fel tak tak, mahni kalna zawna taima tak tak thahnem tak an awm a ni," a ti.

Ruatkima chuan thalaite talent haichhuah kawngah theih tawp an chhuah thu sawiin, "Thalaite an tuina leh an talent hmanga ei an zawn theihna tur kawng hi kan zawng zel dawn a ni. Thalaite hunawl hman thatna tur leh Talent hai chhuaha an infiamna tur hmunhma pawh siam belh mek zel a ni hi a lawmawm ka ti tak zet a ni," a ti bawk.