Aizawl September 7, 2023 : Vawiin khan Mizoram Pradesh Youth Congress Committee (MPYCC) chuan Vanapa Hall, Aizawl-ah State Convention an nei. Khuallian Lalsawta chuan thalaite Pathianin ram siamtha turin a ko tih a sawi. Khualzahawm Congress Legislature Party Leader Zodintluanga pawhin thalaiin dik taka hna la thin Congress party sawrkar leh hun an nghakhlel tiin a sawi bawk.

MPYCC State Convention-ah hian MPCC President Lalsawta chuan thu sawiin, "Kan ram rawngbawl tur hian vawiin-ah hian Lalpan thalai te a ko che u a ni. Politics hi a sir atanga lo thlir ringawt hian awmzia a nei lo a, thalai mi thiam politics ngeihven lem lo te pawh, kan ram chhe mek siam tha leh tur hian a chhung an rawn luh chih ve a ngai tawh. Lalsawta'n a ko lo che u a, kan Pathianin kan ram siam tha tur hian a ko che u a ni," a ti.

Khualzahawm Congress Legislature Party Leader Zodintluanga chuan, "Congress sawrkar leh hun mipuiin an nghahhlelh leh tawhna chu thalai zingah pawh a thiam ten hna an hmu leh dawn tih hi a ni," Congress MLA chuan a ti.

Congress party avanga Mizorama hmasawnna a thlen thu sawiin, rambuai ata remna leh muanna thlentu party hian hmasawnna a keng tel tih sawiin Zodintluanga chuan, "Congress hi a ni lawm ni kan ramah remna leh muanna thlentu chu? Kan ramah rambuai avanga kum tam tak hmasawnna a thuanawp reng hnuah, remna leh ralmuanna avangin vawiinah hmasawnna neiin kan awm a ni," a ti.

MPYCC President hlui Zodintluanga chuan thalai kalkhawmte chu fuihin, "Mizoram thalaite tan Congress thalai hi kan awmna tur dik tak a ni, political party hrang hrang kan en a, an thalaite ramhruaitu-ah an chher chhuak ngai meuh lo. Kum 2003 khan Congress MLA 12 zinga 9 kha Youth atanga chhuak kan ni a, 2008-a kan sawrkar khan Youth chhuak Minister 6 kan nei a, 2013-a sawrkarna kan chan leh khan Youth chhuak MLA 13 kan ni a, Panga Minister kan ni leh a ni," a ti.

"NLUP hlawhtlinnate kha hmuh hmaih lo ila, ka bial Thoranga Laisawral khua, khaw lian vak lovah pawh khuan NLUP hmunphiah chingtuten nuai 80 chuang te an lalut a ni," Zodintluanga chuan a ti.

Zodintluanga chuan, sawrkar laipuia Cabinet Committee on Economic Affairs, phalna-in chhungkaw nuai 1.2 tan kum 2010-2011 khan Mizorama Congress sawrkarin NLUP bul a ṭan a. NLUP a ṭhat em avangin Planning Commission-in chhungkaw nuai 1.2 pek tur aia tam min pek belh a. Ruahman lawk aia tam chhungkaw 1.3 zet kan tuam hman a ni, a ti.

"Tlangram lo neih kalphung tihtlem tumna chu NLUP hian a hlawhtlinpui niin ngaih a ni a. Economic Survey tarlan danin NLUP hun laiin Mizoramah tlangram lo neih hi zaa 55.36 laiin a tlahniam hman," a ti.

Zodintluanga chuan, "Medical College, Tuirial HEP, Aizawl tuilak Phase-III thlengin, Sports hmasawnna Infrastructure hrang hrang, Catch Them Young, AMC dintu leh Bawlhhlawh paih PPP Mode kalpuite bakah ram rotling hi Congress hian kan hnutchhiah teuh a ni," a ti bawk.