Aizawl: Hachhek bialtu MLA Lalrindika Ralte chuan, "Thalaite hi kan ram leh hnam hmalam hun neitute in ni a, a siamtha tu tur pawh nangmahni in ni," a ti.

Aizawl City College Joint Students' Union (ACCJSU) ten nimin Bawngkawn South YMA Hall-a Assembly cum Election an neih a hmanpuinaah he thu hi sawiin Lalrindika Ralte chuan zirlaite chu tute emaw hmanrua a tang mai mai lo tura fuihin, "In theihna leh in chakna hi mimal emaw, pawl emaw, political party-ten hmanruaa an hman in phal tur a ni lo a. Tuten emaw an duh an tih tir a, an duh loh an tih tir loh mai mai theihin in awm tur a ni lo. Chutianga bungrua anga hman tumtu che u an awm a nih chuan, chung mite chu in hmelma an ni a, ram leh hnam hmelma an ni bawk tih in hriat ka duh," a ti.

ACCJSU Assembly-ah hian Aizawl khawpui chhunga College hrang hrang 10-a Students' Union hruaitute an kalkhawm a, kum thar 2023 atana hruaitu tur an thlang nghal a, inthlan hi RB Lalmalsawma, NSUI President leh a thawhpuiten an buaipui a ni.