Coimbatore-a neih zawh takah motorcycle Champion Rider leh pahnihna te chu Mizo tlangval an ni a, tun hnai khan Chief Minister chuan a chenna Inah thingpui inpuiiin mi tumruh, tan lak nachang hria Mizo thalaite chu an hlawhtlinna atanga hlawhtlin lehzualna an hmuh theih nan theih tawp chhuahin puih an nih zel tur thu a lo chah a ni. RedBull Road To Rookies, Coimbatore, Tamil Nadu a neih zawh tak a champion hi Spain ramah RedBull Rookies Cup Qualifying tlan tur in October thla khian a kal dawn a; amah dawttu tan pawh ram pawn lam a kalna tur kawng a inhawng tura rin a ni. Khawvel inthlak chho zelah ‘infiamna’ sports kan tih hi Mizoten kan sawifiah dan leh kan pawm zau dan hi a nawlpuiin kan thlak a pawimawh hle mai a. Kan hriatthiam fumfe loh emaw ‘potential’ a awm tih kan man phak loh deuh thil thar pawm hi kan harsat em aw? tih zawhna a piang thei awm e. Tun hma deuh atang khan khawlaia chak tak taka tlan thin thalai kan nei tan a, an thawm pawh a ring fo thin a, khawtlang ang pawhin hnawksak kan ti a, a vaiin kan vai thin reng a ni. Heng thalaite hian entawn an nei a, châk zawng an nei bawk a. Kan hmun hmain a zir lova, inphochhuahna hmun tha a awm loh avangin hmun awl an hmuhah an tuan ta mai niin a lang zawk a ni. Hemi a nih avang hian chak deuh deuha lirthei khalh thin thalai thenkhatte hi thiam kan chantir ngawt tihna a ni hauh lo. Tunah chuan pawl mumal tak ding tawhin khawpui pawn lamah an thiam thil te chu tangkai zawka pholan theihin dawhsan an nei thei tawh a, hetiang dinhmun mai bakah ram pum huapa ber nihna hauh thei dinhmuna ding turin thiam thil (skill) an lo nei reng tih hriat hian inelna dangah pawh kawng a inhawn beisei tlat ila kan tihsual tam a rinawm loh hle. Football kan tuipuina a rei tawh viau a, chutih rualin hun rei tak chhung chu dinchhuah pui sawi tur an tlem hle a, a tihfuh zual thenkhat te chu Sawrkar Department ah hna pek an ni tawk a ni. Infiamna hian chaw a chhawp lo tih chu mi nawlpui ngaihdan a ni hman a ni. Tunhnaiah football lamah sawrkar leh pawlin hma nasa takin an la a, thalaiah tui tharna nasa takin a pian phah a ni. Tunah chuan ram pum huapin hmanni lawkah ‘ber’ nihna kan hauh zo chauh a, tunah chuan kan ram pawn thlengin Mizo thalai an inzarpharh a, maktaduai telin club tha te’n kan Mizo player te an inchuh mek a ni. Football chauh nilovin infiamna hrang hrangah pawh kan zavai hian rilru kan hawn a pawimawh tih a lang chiang hle a, kan thalaiten thiam thil an nei tih hi Sawrkar, pawl leh mi nawlpuiin kan rinsak tlat a pawimawh a. A hnual zawnga in sawi lovin infuih na thu ri tam sela a that a rinawm a, chu chu kan thalaiten tun dinhmuna an mamawh pawh a ni.