Aizawl : Health Ministers’ Conference hmanga New Delhi-a cham mek Dr. R. Lalthangliana, Minister, H&FW, H&TE leh Commerce & Industries Deptt changtu chuan conference an hman zawh hnuah Ministry hrang hrang a dawr kual nghal a, Mizoram mamawh te a sawipui hlawm.

Commerce & Industry minister hian Ministry of Petroleum Director General leh official dang te nen inkawmhona neiin, Mizorama oil leh gas hausakna awmze nei leh uluk zawka la chhuakin hma la turin a thlen a, anni pawhin theihtawp chhuah an inhuam thu an lo hrilh.

Higher & Technical Education a nihna angin Dr. Thangte hian MZU chungchangah he lama thuneitute a kawm a, MZU hnuaia teaching faculty leh staff dangten HRA 10% an lak chu North-east states dang leh NEHU a thawk te anga 20% an lak thuai theihna turin thuneitute hnen-ah hian a thlen. MZU Southern Campus Lungleia dinna tur proposal thehluh tawh pawh chak zawka hma laksak turin a ngen.

Minister hian Union HRD Minister chu MZU Convocation-a Chief Guest tura chah chhuah a nih ngei theih dan tur a sawipui a. CSS Hindi zirtirtu 1000 chuang rawihna tur atan a rang thei ang bera tihhlawhtlinsak thuai turin a thlen.

Mizoram leh ram dangte insumdawn tawnna hmun tur leh sumdawnna kalpui a nih mekna Kawrpuichhuah, Zochachhuah leh Zo-khawthara border trade kalpui tihchangtlunna tur te, Mizoram hmun thenkhata border haat a rang lama siam a nih theih nan high level team te a hmun ngei a kala enfiah turin a ngen bawk.

Ministry of DoNER lama official te pawh hmu telin H&FW leh H&TE department proposal thehluh tawh te chak zawka tih hlawhtlin a nih theih nan thil awmzia a sawi pui a. Tin, Industry tihhmasawnna kawng khat atan tunhnai remchang ah Interactive workshop Aizawl a buatsaih dan tur te an sawiho bawk.