Aizawl; Tuirial bial by election neih tur atan Election department lamin inbuatsaihna an kalpui tan a, vote thlakna tur hmanrua, EVMs leh VVPATs te chu a thawhkhatna atan enfiah zawh tawh a ni.

Tuirial bial by election neih tur chungchangah hian ZALEN zawhna chhangin Joint Chief Electoral officer, David L. Pachuau chuan by election buatsaih turin an inhmakhua tan tawh tih a sawi a, inthlan neih hun tur erawh bituk a la awm lo tih a sawi. ECIL engineer ten vote thlakna tur hmanrua te a thawh khatna atan an endik zo tawh tih sawi bawkin, inthlan buatsaihna tur thil tul dangte pawh an thlir ho mek zel niin a sawi.

Tuirial bial by election atan hian Mizoram a political party lian 3, MNF, Congress leh ZPM te chuan nomination committee an din fel tawh a, candidate tur tifel erawh an la awm lo.

Tuirial bialtu MLA Andrew H. Thangliana chu August ni 17, 2021 zing dar 6:35 khan a thi a, hei vang hian Mizoram Legislative Assembly secretary H. Lalrinawma chuan August ni 18, 2021 khan Tuirial Assembly constituency chu MLA luahtu awm lo, bial ruak a ni tih a puang a. ECI dan ang chuan, MLA constituency-te a ruaka puan a nih atanga thla ruk chhungin by-election neih tur a ni.