ZALEN October 27, 2024 : Inter High School Quiz competition hmanpuitu Home Minister K.Sapdanga chuan, "Thawhrimna leh rinawmna inpawlhin hlawhtlinna rah a chhuah thin a ni," a ti.

Mizo Zirlai Pawl in High School zirlaite puala Inter High School Quiz competion an buatsaih kharna hun Zirtawpni zana neih a hmanpuinaah he thu hi sawiin Home Minister chuan zirlaite zingah theihtawp chhuaha lehkha mi tam tak an awm ta chu lawmawm a tih thu sawiin, "Kan thalaite zingah ni khata darkar 15 lehkha zir an awm ta te hi lawmawm ka ti tak zet a, mahse hnam dang zingah chuan ni khatah darkar 18 chhung lehkha zirte an awm a. Heng mite tan hi chuan khawvel hi a zuamawm bik a. Intihsiakah state dangte nen inel tur chuan thahnemngai leh rim leh zuala kan beih a la ngai a ni," a ti bawk.

Inter High School Quiz competion-ah hian St.Joseph HSS chu pakhatna niin CLS Academy chu pahnihna an ni a, Solomon H/S chu pathumna an ni.