1990s tawp lam leh kum sang bi thar kai hlim vela football en nasa chuan a chunga thlalakte hi en sela, an hming an an sawi zuah zuah thei vek hial mai thei. Louis van Gaal-a’n 1994-95 season-a a team kaihhruaite an ni a, mi thenkhat chuan tun thlengin ‘khawvela team tha ber’ ti hialin an sawi thin.

Dutch coach hlawhtling, van Gaal-a hian hemi season-ah hian Ajax Amsterdam hi inelnaa an telna zawng zawngah a champion-pui vek a ni.

Dutch league-ah a vawi 25-na atan an champion a, Uefa Champions League-ah an champion bawk a. Heng inelna pahnihah hian chak loh an nei miah lo tluan thak ve ve.

Tun thlengin tual chhung league leh Champions League-a chak loh nei miah lova champion thei awm chhun an la ni ta reng a ni.

Eredivisie (Dutch league)-ah hian vawi 34 inkhelhah vawi 27 chakin vawi sarih an tumpuite an hnehtawk a. Point 61 hmuin anmahni hnaih bertu, Roda JC chuan point sarihin an phak lo.

Khelh 34 atang hian goal 106 zet an thun a, goal 28 chiah chhuahin goal difference 68 zet an nei a. Goal thun tam ber chu hetih laia kum 18 mi chauh la ni, a hnua Barcelona-ah pawh ropui taka khel zui ta, Patrick Kluivert niin goal 18 a thun.

Champions League lamah vawi 11 khelin vawi sarih hnehna an chang a, vawi li an tumpuite an hnehtawk thung.

Hemi season-ah hian Dutch striker ball tauh thiam tak, Kluivert bakah hian Finnish forward Jari Litmanen chu an goal thun khawl niin intihsiakna hrang hrangah goal 27 zet a thun a ni.

Nomawi lian tham pahnih an lak bakah hian Dutch Super Cup/Johan Cruyff Shield, Intercontinental Cup leh Uefa Super Cup an la tel bawk.

An player-te zinga a tam zawk hi hetih hun lai leh a hnu lam thlenga Netherlands national team-a mi pawimawh tak tak an ni a. Kluivert bakah hian Edwin van der Sar, Frank leh Ronald de Boer unau, Danny Blind, Winston Bogarde, Michael Reiziger, Frank Rijkaard, Clarence Seedorf, Edgar Davids leh Marc Overmars te ho an ni.

Nigerian player langsar tak pahnih, right winger Finidi George leh Nwankwo Kanu an kawl bawk a. Hetih lai hian Arsenal striker hlui, Kanu hi kum 18 chauh a la ni nghe nghe.

(A chunga thlalak hi Vienna, Austria-a Champions League final-a AC Milan an hneh tuma mi a ni a, i hriat an awm em? Tlarhnung vei lam atangin: van der Sar, Seedorf, Rijkaard, Finidi, Frank de Boer, Blind. Tlar hma vei lam atangin: Litmanen, Reiziger, Davids, Overmars, Ronald de Boer te an ni).