ZALEN : March 4, 2025 tlaia Nauhruaikawn, Hnahthial-ah Hnahthial District Fisheries Development Office leh YMA Luidung humhalh Committee ten The Mizoram Fisheries (Amendment) Act 2022 dan bawhchhia a, sangha mantute sangha an man chu halral a ni.

Halraltu George Lalnuntluanga, DFDO chuan Mizoram sawrkar in ram luidung nungcha te humhalhna dan, The Mizoram Fisheries (Amendment) Act 2022 a siam thu sawiin, "Kan lui dunga nungchate a chereu nasat tawh em avangin hemi dan hmang hian nasa takin humhalh hna thawh mêk zel a ni. YMA-te kutke berah hmangin ngawrh takin humhalh hna hi buaipui mek a ni." a ti.

"Mipuite, dan phalloh hmanga kan ram luidung nungchate sawisa lo tura chahin lui dunga nungcha man turte chuan Department hnen atanga License siamtir tura an inhriattir nawn leh a ni. License tello hian khawilaiah mah luia nungcha man, tihbuai leh thah hi dan in a phal lo bur a ni," a ti bawk.