ZMC atanga MBBS pass thar te NMC-in internship tih phalsak

Aizawl : Health Minister Dr R. Lalthangliana chuan ni 22.4.23 khan New Delhi-ah National Medical Commission (NMC) hotute a dawr a. NMC hotute hian ZMC-a MBBS pass thar te internship tih an lo remtih sak.
    Health Minister leh Niti Aayog member Dr VK Paul te chuan NMC Chairman leh NMC-a thuneitu sang (Advisers, Board Member) te dawr in, ZMC-a MBBS batch hmasa ber te chu Internship program tan nghal turin an remti ta a ni. ZMC a zirchhuak MBBS te bakah, Foreign Medical Graduate te tan seat riat (8) internship tih phalna, NMC hian a lo pe tawh bawk a ni.

Ruihhlo do khuh hawng

Aizawl: April 24, 2023 khan Excise & Narcotics minister Er. Lalrinawma, Ruihhlo Do Working Committee Chairman ni bawk chuan Ruihhlo do khuh hawnna hun Assembly Annexe Conference Hall-a neih chu khuallian niin a hmanpui.
    Chief Minister Zoramthanga hmalakna in nikum 2022 May thla khan 'Core Committee on Ruihlo do' hi neih a lo ni tawh a, Committee in a rel angin Social Welfare Minister chairman-na hnuaiah working committee din nghal niin, ruihhlo dona kawngah chak zawk a hmalak a nih theih nan Supply reduction, Demand reduction leh Harm reduction te mumal taka kalpui mek a ni.

Hmarchhaka Property Card semchhuahna hmasa ber nei

Aizawl: India hmarchhak-a Survey of Villages Abadi and Mapping with Improvised Technology in Village Areas (SVAMITVA) Scheme hnuaia Property Card semchhuahna hmasa ber chu April 24 khan Phulpui leh Tachhipah te neih a ni a. 
    He hun hi Land Revenue & Settlement Minister Lalruatkima chuan khuallian niin a hmanpui a, Property Card semchhuah chu hmasawnna ropui tak a ni, a ti a. Property Card chu LSC nen a danglam loh thu sawiin, Property Card hmangin mipui ten awlsam zawka loan an lak theih tur thu leh zangnadawmna lak kawngah pawh VC Pass-in a huam ve loh ram hlutna (land value) chhut tel a nih tawh tur thu a sawi.

MZP ten World Book Day

Aizawl : April 24 khan MZP Conference Hall-ah MZP General Headquarters, Aizawl chuan World Book Day pualin hun a buatsaih a. Information and Public Relations Minister Lalruatkima chu khuallian niin he hun hi a hmanpui.
    World Book Day hi World Book and Copyright Day emaw International Day of The Book ti a sawi a ni bawk a, UNESCO in kum 1995 atangin April ni 23 hi World Book Day atan a lo buatsaih a ni a ti a. Mizoram-ah MZP hmalakna in Kum 2022 khan he ni pualin hun hman tan a ni. Kumin hi Pathian ni a nih avangin a ni ah hmang lovin a tukah hman a ni.

Keitum -Artahkawn inkar Lei hawng

Aizawl: Tuichang lui chunga Mizoram PWD in Double Lane BUSG Girder Bridge an siam (Ch: 6:000 Kmp on Keitum -Arțahkawn Road) chu 25.04.2023 khan Chief Minister Zoramthanga chuan khuallian niin a hawng. 
    He lei hi Central Roads Fund (CRF) leh Scheme Special Assistance to States for Capital Investment (SASCI) atanga sum hmuh hmanga sak a ni. Lei thar dawh naah harsatna eng eng emaw tawkin, lei design chu thlak a ngaih avanga Central Roads Fund atanga sum hmuh in Wingwall atan Provision siam a lo nih loh avangin Sawrkar ah a zawhna tur SASCI atangin Rs 259.45 lakhs dah belh a ni. 

MW20 pe chhuak thei Vankal Solar Park hawng

Aizawl: Sawrkar laipui Ministry of New & Renewable Energy (MNRE) leh Mizoram Sawrkar tangkawpte siam nizung chakna hmanga kawlphetha Mega Watt 20 (20 MW) pe chhuak thei Vankal Solar Park, North East a hmasa ber leh lian ber, cheng nuai 2107 senga din chu tangkai taka hman theih turin Power & Electricity (P&E) Minister R.Lalzirliana chuan April 25 khan khuallian niin a hawng.

Ngopa VC Award lawmpui

Aizawl : April 25 khan LAD Minister K.Lalrinliana, chuan a Office Chamber-ah National Panchayat Awards-2023 'Nanaji Deshmukh Sarvottam Panchayat Satat Vikas Puraskar (NDSPSVP)' lawmman pakhatna dawngtu Ngopa Village Council te, Press mi te leh Local Administration Department Officials te lengah sawmin thingpui inhona a neihpui a ni.

LV Prasad Eye Institute leh Mizorama Damdawiin te thawhhona sawipui

Aizawl : April 25 khan Governor Dr Hari Babu Kambhampati huaihawtin LV Prasad Eye Institute, Hyderabad hotute chuan thawhho dan sawipuiin Health Department, Zoram Medical College (ZMC),National Health Mission (NHM), Synod Hospital leh Eye Care Hospital thuneitute an kawm.
    Governor chuan India hmun hrang hranga LV Prasad Eye Institute-te hmalakna chu fakawm a tih thu a sawi a. Mizoram mipui tana mit lam inenkawlna tha zawk pek inhuama, Health Departmen, Sawrkar leh Private Hospital te nena thawhona tha neih beisei a Aizawl an lo thleng chu thil lawmawm tak a ni a ti.

Mizoram leh Puducherry RD Minister inkawm

Aizawl : Mizoramin MNREGA Scheme-a kalpui dan zirchiang tura lo kal Puducherry DRDA Minister A.K. Sai J Saravanan Kumar leh a team-te chuan Rural Development Minister Lalruatkima kawmna April 26 khan Aijal Club-ah an nei.
    Mizoramin MGNREGA Scheme-a kalpui dan zirhonna an nei nghal a ni. RD Minister chuan MGNREGA zirchiang tura lo kal AK. Sai J Saravanan Kumar leh a team-te chu Mizoramah a lo lawm tih sawiin, an hlawkpui ngei a beisei tih a tarlang a. Uluk taka zirchianna nei tur leh Mizoramin MGNREGA-a kalpui dan system tha laite chu hawnpui a, hmang ve ngei turin a sawm a ni.

Mizoram GST zirchianna nei

Aizawl : Mizoram GST zirchianna nei a lo zin Pu Yogendra Garg, Chief Commissioner CGST, CEX & Customs, Guwahati Zone, chuan Governor Dr.Hari Babu Kambhampati chu April 26, 2023 khan Raj Bhavan-ah hmuin inkawmna an nei.
    Yogendra Garg chuan Mizoram a rawn tlawh chhan hi Governor chu hrilhin, Mizoram Goods and Services Tax (GST) dinhmun a sawipui a ni. Mizoram ah GST kaltlanga chhiah petu an la tlem thu hrilhin a bik takin mizo contractor- te zingah GST hmang a chhiah pe an la tlem hle niin Governor hi a hrilh a. Mipui zingah GST chungchang hriatfiah tawk lohna a sang hle nia a hriat thu sawiin, sawrkarin chhiah a hmuh tur ang a hmu tawk lo a ni, a ti.

Zokhawthar ramri tlawh

Aizawl: Commerce & Industries (C&I) Minister Dr. R. Lalthangliana chuan April 27 khan Champhai District chhung Indo-Myanmar ramri depa awm insumdawntawnna Zokhawthar khua a tlawh. 
    C&I Minister chuan ramri kaltlanga insumdawntawnna chak zawka kalpui a nih theihna tura hmalakna kalpui mekte a enfiah a, hmachhawp awmte bawhzui dan tur a enfiah nghal bawk. Dr. R. Lalthangliana hi Law & Judicial Minister Pu T.J. Lalnuntluanga, Champhai South bialtu MLA chuan a tawiawm a ni.

Hackathon - smart policing atana intihsiakna hawng

Aizawl : Governor Dr Hari Babu Kambhampati chuan vawiin khan Hackathon - police hnathawh tanpuina ngaituah chhuak tura computer thiam rual intihsiakna chu Arya Mess, PHQ-ah a hawng a. 
    Hackathon(Hackadventute) hi Mizoram Police leh National Institute of Technology, Mizoram(NIT) tangkawpa buatsaih a ni a. He hunah hian India ram hmun hrang hranga NIT zirlai te, MZU, Govt Zirtiri Residential College, NIELIT leh ICFAI University a computer zirlaite chuan Police ten dan leh thupek an kenkawh kawnga harsatna an hmachhawn hrang hrang te an zirchiang anga, hemi behchhan hian Smart Policing atana Technology tha ngaihtuah chhuah an tum dawn a ni.

Governor in RD Official te PMAY(Rural) kalpui dan sawipui

Aizawl : Governor Dr. Hari Babu Kambhampati chuan April 27 khan Raj Bhavan-ah Rural Development Department hotulute kawmin PMAY(Grameen) hmalakna leh hmasawn dan a sawipui.
    Governor nena inkawmnaah hian Dr. Lalzirmawia Chhangte, Secretary, Irene Zohlimpuii Chongthu, Addl Secretary leh Zoremthara Ralte, Deputy Secretary ten RD ai an awh a. RD hotute hian PowerPoint hmangin PMAY(G) hmalakna kalpui meka Data thar ber an tarlang a. Insak tawh zat, insak zawh tawh zat te, installment hrang hranga tanpuina dawn tawh chin te an tarlang a ni.