Excise leh AR tangkawpin Meth man

Aizawl : Excise & Narcotics Department leh Assam Rifles te thawkho chuan Methamphetamine thanhnem tak an man.

  Excise & Narcotics Department leh 14th Bn. Assam Rifles te thawkho chuan December ni 2, 2025 (Thawhlehni) zan dar 8:00 khan Champhai, Lalen Veng-ah methamphetamine Kg 5 & gram 555 (Tablet 55,000) leh a neitu nia puh –Zolianthangi (47) d/o Sangkhuma (L), Lalen Veng, Champhai Venglai nia inchhal chu an man. Heng Methamphetamine te hi Karimganj, Assam-a hralh tura hma lak mek lai a ni.

  Methamphetamine vanga man, Zolianthangi hi The Narcotic Drugs &Psychotropic Substances Act, 1985 tlawhchhanin thubuai siamsak a ni a, Deember ni 3, 2025 khan District & Sessions Judge, Champhai-ah hruai nghal a ni.

PUC-ah Korea Tawng zirna hawng turin MoU ziak

Aizawl: Pachhunga University College leh MGH Korea te chuan December 2, 2025 khan PUC-a Korea tawng zirna hawng turin inremna thuthlung an ziak a, nakum January 27 hian class tan hman tum a ni.

  Inremna thuthlung hi PUC aiawh Prof. H. Lalthanzara, Principal leh MGH Korea aiawh Kim Jungae ten an sign a. MGH Korea hian Canada, India leh Myanmar-ah te Korea tawng zirna an buaipui a, an ram sorkar atanga phalna nei an ni. 

  PUC-ah hian MGH Korea te hian zirtirtu rawn tirin Korea tawng hi a rawn zirtir dawn a. Korea tawng zir tur hi beginner level a ni ang a, thla thum zir tur niin a fee hi Rs 10000 a ni ang. PUC hian tawng zirna hmun tur leh an mamawhte a lo ngaihtuahsak bakah zirlaite admission te lo tihsak thung dawn a ni.

  PUC hian October ni 28, 2025 khan Japan tawng zirna hawng turin JACEEX LL Ltd. Guwauhati te nen thawhhona thuthlung an lo ziak tawh bawk a ni.

ZMC&H gate bulah Meth man

Aizawl: Excise & Narcotics Department chuan Pathianni khan Falkawn-ah Methamphetamine thahnem tak an man.

  Excise & Narcotics Department, Falkawn JAC leh FIU, Assam Rifles thawkho chuan November ni 30, 2025 (Pathianni) zan dar 6:45 khan Zoram Medical Center & Hospital (ZMC&H) Gate bul, Falkawn-ah Methamphetamine Kg 3 & gram 990 (Tablet 40,000) leh a neitu nia puh mi pahnih – Malsawmthara (30) s/o Lalduhawma, Tahan, Myanmar (tuna Tuikhurhlu-a khawsa mek) leh Jerry Lalruatkima (27) s/o Biakcheuva, Electric veng, Aizawl, (Tuna ZMC&CH, Falkawna khawsa mek) nia inchhalte an man.

  Methamphetamine phurh kualna atana an hman FORD Ecosport Car Regn. No. MZ01-N-1132 pawh hrensak an ni. Heng Methamphetamine te hi state pawna hralh tum mek lai a ni.

Tualthah case chhuichhuak rang police officer chawimawi

Aizawl : Mamit District SP Manny Bhushan Singh chuan Kendriya Grihmantri Damshata Padak 2025 chawimawina dawngtu, Mamit District Executive Force-a mi SI Samuel Lalramenkima hnenah sawrkar laipui Ministry of Home Affairs-in lawmpuina lehkha (appreciation letter) a pek chu 4.12.25 khan a hlan.

  SP chuan entawntlaka hnathawk zel turin a chah a. He chawimawina hi Mizoram Police miten an dawn zel a beisei tih a sawi.

  Kumin February-a Bungthuam Mamit district-a inthahna case rang taka chhuichhuah a nih theihnaa hma a lakna avangin SI Samuel Lalramenkima he chawimawina hi a dawng a ni.

Mizoram Buyer Seller Meet 2025 hawng

Aizawl: Mizoram Agricultural Marketing Board, International Fund for Agriculture Development (IFAD) leh Mission Organic Mizoram tangkawp buatsaih, ‘Mizoram Buyer Seller Meet 2025’ chu December 5, 2025 khan Aijal Club-ah Agriculture & Farmers' Welfare Department Minister PC Vanlalruata chuan khuallian niin a hawng.

  Mizoram Buyer Seller Meet 2025 hawnna hun ah hian Lalmalsawma Pachuau, Secretary, Planning & Programme Implementation Department chuan Mizoram Sawrkar Flagship Program Bana Kaih Scheme nihphung tlangpui tarlanna hun leh thlai thlan bik, Sawhthing, Aieng, Mizo Hmarchate leh Hmunphiah tihralna kawnga Sawrkarin tanpuina a pek dan a sawifiah a. 

  Hanisha Vaswani, Consultant, IFAD chuan Mizorama thlai leh thei tharchhuah leh man man zawka tih ral kawnga hmalak theih dan a tarlang a. Buyer Seller Meet 2025 ah hian State pawn atanga ‘Buyer’ inziaklut hi 40 bawr vel an ni a, Mizorama thar chhuah thlai, thei leh a kaihnawih chi hrang hrang phochhuahna stall 50 a awm bawk a ni.

Consumer-te Zin Kawng tlangzarh

Aizawl: Food, Civil Supplies & Consumer Affairs Department Minister B. Lalchhhanzova, chuan December 4, 2025 khan Aizawl Press Club-ah Pu Lallunghnema lehkhabu ziah, ‘Consumer-te Zin Kawng’ tih chu a tlangzarh.

  Minister chuan ‘Consumer-te Zin Kawng’ lehkhabu chu mipuiin an hlut a tulzia leh consumer rights chungchanga hriatna zau zawk petu a nih a beisei thu a sawi bawk a. Mipui chanpual pekchhuahna kawnga mipui, sawrkar leh NGO-te thawhhona tha neih a tulzia a sawi bawk a ni.

Tui Leak Report-na App hmang tha te chawimawi

Aizawl : Public Health Engineering Department Minister Prof. Lalnilawma chuan December 4, 2025 khan Conference Hall, E-in-C PHED Office-ah Tui Leak Report-na App Hmang Tha Zualte Chawimawina hun chu khuallian niin a hmanpui.

  Prof. Lalnilawma chuan media nena thawhhona tha a pawimawh thu sawiin, an harsatnate media kaltlanga an puanzar chuan mipuiin an hrethiam thin a ni, a ti.

  Minister chuan Tui Leak Report-na App hmang tha zualte, a hnuaia tarlante hnenah hian chawimawina thilpek leh sumfai a hlan nghal a ni:

1-na: PB Lalkrosmawia, Tanhril – Vawi 40 – Rs. 10000/-

2-na: F Lalhmangaiha, Chanmari – Vawi 12 – Rs. 7000/-

3-na: RK Nithanga, Chanmari – Vawi 9 – Rs. 5000/-

State Level Bankers Committee quarter ending nei

Aizawl: December 4, 2025 khan Aijal Club-ah Mizorama sawrkar hriatpui bank awm zawng zawngte intawhkhawmna leh an hnathawh thlirletna State Level Bankers Committee (SLBC) for the quarter ending September 2025 neih a ni a. Chief Minister Lalduhoma chuan a telpui.

  Chief Minister a nih hnua SLBC a telpui tum hnihna a nih thu sawiin, meeting hmasa atanga tehin hmasawnna duhawm tak tak hmuh tur a awm a. A bik takin CD Ratio nei tha bank pathum MRB, SBI leh Apex Bank te chungah lawmthu a sawi a. Chutihrualin, bank thenkhat, loan pe chhuak tlem leh lutuk, national benchmark phak lo leh lutukte erawh hi chu en liam mai chi niin an ngai loh thu leh CD Ratio nei hniam ber, 5.30% chauh tlin phak bank pakhat chu an insawifiahna (explanation) a hnena thehlut rang turin a hriattir a ni.

  Bank te hi an sum dawn (deposit) tlingkhawm atanga teha zaa sawmruk (60%) tal mipuite hnena puktir (Advance) tura beisei an ni a. Hei hi an hnathawh tehna langsar taka hman a ni thin. Tun SLBC report-a a lan danin YES bank, Bandhan bank, SSFB, AXIS, HDFC, ICICI leh CBI te CD ratio chu 31% aia hniam vek an ni.

CM leh Hmeichhe naupangte thlan bikte inkawm

Aizawl: Aizawl Sumtual, MINECO ah Mission Shakti hnuaia State Hub for Empowerment of Women (SHEW), Women & Child Development Department te buatsaih-in December 4, 2025 khan Chief Minister Lalduhoma leh hmeichhe zirlai naupangte inkawmna hun “Meet Your CM With Adolescent Girls: A Celebratory Plantation of Trees under BBBP” buatsaih a ni.

  Chief Minister hian naupangte nena inkawmna hun a nei a, an zawhna hrang hrangte a chhansak bakah fuihna a nei nghal a. Naupangte pawhin nuam an ti tlang hle a ni.

  He inkawmnaah hian St Paul’s Higher Secondary School, Govt JL High School, Govt. Chawnpui High School, Neuhof English Medium School leh Mount Carmel School atang tein zirlai hmeichhe tleirawl thlanchhuah te an tel a ni.

  Chief Minister hian Aizawl Sumtualah hian Thing a phun bawk.

Local Council leh P&E Deptt. hotute inkawm

Aizawl: December 3, 2025 khan Aizawl veng hrang hrang Local Council aiawhte leh P&E Department hotute'n, Engineer-in-Chief, P&E Department Conference Hall, Kawlphetha Building Rooftop-ah Joint Meeting an nei a. Er. Lalrinmawia, SE Aizawl Power Circle chuan meeting hi kaihruaiin power supply lamah tun aia hmasawnna neih dan turte leh thawh hona tha zawk neih dan turte sawi ho a ni.

  Meeting-ah hian Aizawl veng tin Local Council atangin Member pahnih (Chairman/(Electric in-charge)/Secreatary)te leh P&E Department atangin Aizawl khawpui chhung enkawltute EE (Distribution Division), EE (Revenue Division), EE (Generation Division) te bakah SDO leh JE-te an tel a ni.

Primary zirtirtu ten an zirlaite tanpuina sem

Aizawl: Mizoram Primary Teachers’ Association (MPTA) chuan zirlai harsate tanpuina Student Endowment Fund chu December 3, 2025 khan Zarkawt Community Hall-ah an sem a, School Education Director Angela Zothanpui’n a hmanpui.

  MPTA te hian zirlai lehkha thiam thei khawsak harsa te chu tanpuina dawng tur hian an zawng chhuak a, Joint Headquarters 1 leh Sub-Headquarters 18 atangin zirlai pahnih theuh an vaiin 38 an thlang chhuak a, heng mite hi tanpuina an hlan a ni. 

  Tanpuina dawng tur zirlai thlan chhuahte hi a then chu thingtlang kilkhawr tak taka awm te an ni a, Aizawl-ah an hruaikhawm a, anmahni hruaitute nen an kalna senso an tumsak vek a, Aizawl khawpui chhung hmun pawimawh chi hrang hrang Science centre, Aizawl lungdawh leh Millennium Centre bakah zan lamah Krismas puala Aizawl khawlai cheimawi te an fanpui a, zirlaiten manhla an ti hle. Kumin hi MPTA ten student endowmwnt fund an sem tum thumna a ni.

Incentive Cash Award to Meritorious Sportspersons sem

Aizawl : December 3, 2025 khan Woodland Hills Roof Top, Zonuamah Sports & Youths Services Minister Lalnghinglova Hmar hovin "Distribution of Incentive Cash Award to Meritorious Sportspersons" hun hman a ni a. 

  Khuallian Lalnghinglova hian 1st April, 2024 - 31st March, 2025 chhunga Sports discipline hrang hrang 15-a International & National level-a Medal (Gold, Silver & Brown) dawng pha chin infiammite 218 leh leh official 41 te hnenah Incentives Cash Award hi a hlan a ni.

  Tun tumah hian infiammite tan award 224 leh Team Official-te tan award 41, a vaiin award 265 sem a ni a. Lawmman pakhat aia tam late an awm avangin lawmman dawngtu hi mi 218 (Mipa-150, hmeichhia -68) an ni. 

  Infiammi ten a Award dawn tamna discipline te chu: Football- 35, Badminton- 4, Muaythai- 30, Taekwando- 29 etc. te niin, Boxing leh Judo atangin 1 ve ve in an dawng bawk.

  Sports Incentive Cash Award sem hi a vaiin Rs. 94,19,925.00 (cheng nuai 94, singkhat, sangkua, zakua, sawmhnih leh panga) a ni.

Mizoram Larsap-in Northeast Conclave, GeoSmart Conference & Expo 2025 hmanpui

Aizawl: GeoSmart World Conference & Expo 2025 hnuaia North East Conclave, New Delhi-a neih chu December 2 khan Mizoram Larsap General (Dr) Vijay Kumar Singh, PVSM, AVSM, YSM (Retd) chuan telpuiin thu a sawi.

  GeoSmart World Conference & Expo 2025 hnuaia North East Conclave hian India hmarchhak pumpui chu mitfuknaah siamin, technology hmanga hmasawnnain India rama biodiversity hausa leh hmun pawimawh tak chang mek hmarchhak state-a danglamna a thlen dante chu thlurbing a ni.

Raj Bhavan Mizoram hming thar Lok Bhavan Mizoram

Aizawl: Sawrkar laipui Ministry of Home Affairs atanga 25.11.2025 a hriattirna lehkha hmuh bawhzuina leh Mizoram Larsap thupek angin December 2, 2025 khan "Raj Bhavan, Mizoram" chu "Lok Bhavan, Mizoram" ti a thlak a ni.

  Mizoram Larsap chenna chu "Raj Bhavan, Mizoram" ti tawh lovin "Lok Bhavan, Mizoram" ti a sawi/ziah zel tawh tur a ni.

Mi huaisen chawimawina hun hmang

Aizawl: Ministry of Home Affairs, Govt. of India atanga mi huaisen chawimawina ‘Jeeven Raksha Padak Award 2025’ dawngtu Laltlanzova, Tlangsam, Champhai District chu lawmman hlanna leh chawimawina hun chu November 2, 2025 khan Home Minister, Office Chamber, MINECO-ah hman a ni a; Home Minister K. Sapdanga chuan he Award-in a kentel chawimawina tangkapui, citation leh pawisa fai 1,00,000/- a hlan a ni.

  Laltlanzova hian September ni 7, 2024 (Inrinni) khan Khawzawl District, Dulte khawdai, Dilmawiah tui tla an awm tih a hriat veleh tui tla chhan nan tuiah a zuang lut ve nghal a; Dilmawi hi feet 50 zet a thuk niin, theihtawpa a beih hnuah tui tla hi la chhuakin, a nunna a chhanhim a ni. He a thiltih ropui tak avang leh mi nunna hlu tak a chhanchhuah avang hian Jeevan Raksha Padak Award 2025 dawng tura thlanchhuah niin vawiin December 2, 2025 (Thawhlehni) hian chawimawina hi hlan a ni ta a ni. 

Tuirini HEP MW 24 hnathawhna pawisa tum tur Bank kawm

Aizawl: Chief Minister Lalduhoma chuan a office-ah December 1, 2025 khan New Development Bank, India hotute a kawm a. Tuirini HEP thawh thuai dan tur a sawipui. NDB hotute hi F. Rodingliana, Minister, P&E leh P& E official pawimawhten an tawiawm a ni.

  Tuirini HEP hi Megawatt 24 pe chhuak thei tura duan a ni a, Rs. 676 Cr. senna tur niin, a thawhna tur hi sorkar laipui kaltlangin New Development Bank, Sanghai sum puk tur a ni.

  Hna hi tan turin Empowred Committee din fel a, chumi zawhah Project Management Consultancy thlan tur a ni a. Chungte chu tunah hian chak taka kalpui mek a ni. Hengte hi a fel a, central sorkarin a lo pawmpui chuan tender tihchhuah theih a ni ang.

  Preliminary Project Report (PPR) hi Department of Economic Affairs-ah September 2024 khan thehluh a ni tawh a, MNRE, External Affairs leh NITI Aayog atanga phalna lak ngaite chu lak fel tawh an ni.

MAMB thukhawm || Ginger Capital of India-a puan lawmthu sawi

Aizawl: Chief Minister Lalduhoma hovin December 1, 2025 khan Mizoram Agricultural Marketing Board te chu CM Conference Hall-ah an thukhawm a, Mizoram Ginger Capital of India-a an puan avangin NITI Aayog chungah lawmthu an sawi.

  November ni 24 a New Delhi-a neih zawh tak Mizoram sorkar leh NITI Aayog buatsaih Stakeholders Consultation for Mizoram Ginger Produce chungchang report a ni a. Sawrkar laipuia Ministry hrang hrang aiawh leh sawhthing leitu leh process-tu investor 60 chuangten Mizoram sawhthing lei leh hralh chungchang inrawnkhawmna an nei a ni.

  Consultation Meeting-ah khan NITI Aayog chuan Mizoram chu "Ginger Capital of India" ah a puan a ni.

  Kumina sawhthing lei chin report pek a ni a. Sawhthing hi kg 3,38,35,182 lei a ni a, support price pek chhuah zawng zawng chu Rs. 1,37,72,04,477.50 a ni.

  Nakuma sawhthing lei tan ni atan February ni 2, 2026 chu an ruat a. Hmunphiah hi February leh March 2026 chhunga lei a ni ang a, Aieng leh Mizo Hmarcha hi February atanga April thla chhung lei a ni ang a, Buhhum hi tun Novemberah hian lei tan tawhin kum thar January thla thleng lei a ni ang.