YMA in mi 37 khawm, an vaiin home-ah dah vek an ni

Aizawl: Chhinga Veng Branch YMA chuanJanuary 15, 2026 khan an veng chhunga thlanmual a ruihhlo ti thin leh ruihhlo zawnga kal mi 37 an khawm a. Ruihhlo vanga an khawmte hi an za vaiin Home-ah dah an ni. Hemi atan hian Police leh Excise-te nen tangkawpin Van hmangin Home-ah an dah a, Excise leh Police te chungah Chhinga Veng Branch YMA chuan lawmthu a sawi. 

  Thlanmualah hian ualau taka taka ruihhlo ti an tam thei hle a, a bul hnaiah School-te awmin, School naupang leh hmeichhe tan thlanmual kaltlang pawh a hlauhawm thin a. Hetiang hian Chhinga Veng YMA hian hma a la ta a ni.

Union Territory phutin Lamka-ah kawngzawh

Aizawl: Kuki-Zo Council hnuaia Indigenous Tribal Leaders’ Forum (ITLF) chuan January 14, 2026 khan Lamka tia hriat bawk Churachanpur-ah mipui kawngzawh an buatsaih a. He huna resolution an pass zingah Union Territory neih an phutna chu a langsar ber a. KZC leh ILTF te hian an resolution hi Churachanpur DC-ah an thehlut nghal a ni.

  Kawngzawh hi Sielmat Ground leh Koite Ground atangin tan a ni a, Peace Ground-ah intawkkhawmin; khawtlang hruaitute'n thu an sawi a. Kawngzawh chhung hian Kawngpui dunga sikul, in leh dawr hrang hrangte chu khar vek a ni.

END ten Methamphetamine Tablet 1,20,000 man

Aizawl: Excise & Narcotics Department chuan January 12, 2026 (Thawhtanni) zan dar 7:30 khan Khatla, Tennis Court bulah Methamphetamine Kg 11 & gram 118 (Tablet 1,20,000) leh a neitu nia puh mi pahnih an man.

  Heng an mi man te hi Yahya Hussain (23) s/o Abdul Khalik, Jagannathpur, Karimganj District, P.S Ratabari, Assam leh Lalchhuanliana (45) S/o Thangluaia (L), Ruantlang, M-Section, Champhai, tuna Durtlang Leitan-a khawsa mek nia inchhalte an ni a. Methamphetamine phurh kualna atana an hman, Mahindra Thar Roxx (Regn. No. MZ01 AE-4632) bakah Mobile phone 2 hrensak an ni bawk.

  Heng methamphetamine mansak te hi Assam lama ken tum mek lai an ni. Methamphetamine vanga mante hi The Narcotic Drugs & Psychotropic Substances Act, 1985 (NDPS Act) tlawhchhanin thubuai siamsak an ni a, January 13, 2026 khan Special Court (NDPS Act), Aizawl District-ah hruai nghal an ni.

Kum 59 mi Khuaiin zuk hlum

Aizawl: January 12, 2026 khan Khawhaiah tlangval kum 59 mi khuaiin a zuk hlum.

  Khawhai atanga ZALEN thudawn danin, January 12 chawhma lam khan Rongenga (59) Khawhai khua chu a huan sam lai Khawichhunmu in a hrawk, nghawng, ir leh a lu ah te a zuk a, Khawhai PHC panpui nimahse nimin tlai dar 5 velah a thi a ni. A ruang hi tlaivarpui niin, January 13 chhun khan vui a ni.

Ruihhlo kaihnawih-ah mi 192 khawm

Aizawl: Central YMA hnuaia Kumpuan duty te chuan thla khat chhungin ruihhlo kaihhnawihah mi 192 an khawm tih January 12 khan an sawi.

  December 11, 2025 atanga ni 12.01.2026 chhunga Central YMA hnuaia Kumpuan duty ten ruihhlo leh a kaihhnawih an man dan : Heroin (No. 4) man zat - Hawng 22 leh Tictac 41 ; Ap - 280 Tab leh Ganja - Pack 1

  Ruihhlo kaihhnawiha mihring khawm tawh zat hi 192 an ni a, heng zingah hian home a dah hi 85, excise a pek 2 leh police a pek 2 an awm.

Kawng siamna khawl tichhetu a rinhlelh nupa man

Aizawl: ATL Road kawng siamthat hna thawktu, SLT Company te khawl tichhetu nia rinhlelh mi pahnih (Nupa) te chu January 12, 2026 khan man an ni. 

  Pukpui khawtlang (Local council, YMA leh VDP) hruaitute leh Lunglei Police te chuan January 11 khan SLT Company khawl misualin an tihchhiat hi a hmunah tlawhin an enfiah a. A titu ni theia an ngaihte an inah kal chilhin, hmanraw tihchhiat kaihhnawih an hmu a ni. 

  Pukpui khawtlang chuan rinhlelh zinga hmeichhia (A nupui) zawk hi January 1 khan manin, January 12 khan mipa (A pasal) man leh niin khawtlang hruaitu te chuan an sawi a, an In-ah hian SLT Company te khawl-a pipe ang chu an hmu a ni.

Mizorama Natural gas thlunzawm hna thawh mekte endikin Agartala tlawh

Aizawl: Food Civil Supply & Consumers Affairs Minister B. Lalchhanzova chuan January 14, 2026 khan Gas Pipe hmanga Tripura atanga Mizorama Natural gas thlunzawm hna thawh mekte endikin Agartala a tlawh.

  Tripura Natural Gas Corporation Limited hotute nen inkawmhona an neih hnuin Tripura-a Natural gas hmangtu Industry lian PRAN Beverages (India) Pvt. Ltd., Tripura Industrial Growth Centre, CNG Station leh ONGC hmunpuite a tlawh kual a; eirawngbawl nana natural gas hmangtu pipeline connection 330 awmna Subham Solitaire a tlawh bawk.

  Tripura - Mizoram Gas Pipeline Project hi North East Natural Gas Pipeline Grid hnuaia mi niin, kum 2027 December thla velah thawh zawh hman beisei a ni a, tun dinhmunah 45% vel thawh zawh tawh a nih thu IGCL hotute chuan an sawi a ni.

CM hovin Armed Forces Veteran Day 

Aizawl : January 14, 2026 khan Loch House (Gajraj Hall), Aizawl-ah Sainik Welfare & Settlement Department bultumin 10th Armed Forces Veteran Day cum Ex- Services Reunion of Mizoram neih a ni a. Chief Minister Lalduhoma chuan a telpui a, K. Sapdanga, Home Minister chu khualzahawm a ni.

  Chief Minister hian lawmman chi hrang hrang a sem nghal a. A dawngtu zingah India ram sipai huaisen chawimawina sang ber pahnihna Kirti Chakra nikuma dawngtu Captain Lalrinawma Sailo a tel a. Ani hi Mizo zinga Kirti Chakra dawng thei pahnihna niin Mizoram sawrkar chuan lawmpuina cheng nuai sawm a pe a ni.

  Armed Forces Veteran Day hi India ram pumah kum 2017 atang khan hman tan niin ni 14 Jan-ah hman thin a ni a. He ni hi First Commander-in-Chief of the Armed Forces, Field Marshal KM Cariappa OBE, kum 1953-a pension-a a chhuah ni a ni. Kumin Armed Forces Veteran Day hi a vawi sawmna (tenth) niin, Mizoramah chuan kumin hi an vawi thum hmanna a ni. India ram pumpuia sipai hmunah leh state hrang hrangah Sainik Welfare Department te bultumin a rualin an hmang thin a ni. 

Handholding Scheme hnuaia a din Ginger Processing Unit hawng

Aizawl: Chief Minister Lalduhoma chuan January 13, 2026 khan Sairang Horticulture Centre-a Mizoram Agricultural Marketing Board-in Bana kaih (Handholding) Scheme hnuaia a din, Ginger Processing Unit chu a hawng. Horticulture Minister C. Lalsawivunga chu khualzahawm a ni.

  Chief Minister hian Sawhthing hi thlaleh February ni 2 atangin kan lei tan leh dawn thu a sawi a, Mizo kutchhuak, a zailepna khawl leh a tihrona khawl eng emaw zat hi collection centre-a dah a, an lo hman theiha chhawpsak kan rilruk mek. Chu chuan sawhthing process-na kawngah min pui nasa hlein kan ring.

  Mizoram Agricultural Marketing Board (MAMB) chuan Sairanga Horticulture Centre hmun hma leh building thenkhatte chu private company hnenah sawhthing process nan outsource turin October ni 17, 2024 khan Expression of Interest (EOI) a chhuah a. EOI chhang tute zing atang hian Good Faith, Saron veng te chu thlan an ni.

Sihphir Neihbawih-a quarry min a hmunah tlawh

AIzawl: DM&R Minister Prof. Lalnilawma chuan January 9 tlailam dar 3:30 vela, Sihphir Neihbawih-a quarry min chu January 12, 2026 khan a hmunah kalin a enfiah. 

  Chhiatna thleng chu pawi a ti thu leh chhiattawk te chhungkua leh sihphir khawtlang a tawrhpui thu sawiin, mi 2 a chhilh bo te lakchhuah tuma theitawp chhuaha thawktu Sihphir khawtlang, CYMA te bakah sawrkar department - QRT leh NDRF te chungah lawmthu a sawi.

  He Quarry min hian mi 4 delin, Pu Muana (Manipur) chuan nunna a chan a, hliam tuar mipa pakhat damdawi ina enkawl mek a ni a. Mi pahnih chu an chin hriat a nih loh hnuah pakhat zawk Chakma pa chu Ningani khan lakchhuah leh niin an la lakchhuah loh hi Jharkhand state mi nia hriat an ni.

Mizoram State Legislative Assembly inkhawm

Aizawl : Larsap Gen. (Dr) Vijay Kumar Singh, PVSM, AVSM, YSM (Retd.) chuan January 12, 2026 khan February ni 17, 2026 atanga tan turin Mizoram State Legislative Assembly inkhawm a ko.

  Larsapin Assembly inkhawm a koh hi Mizoram Legislative Assembly pakuana inkhawm vawi 6-na tur a ni dawn a. Tun tum Assembly inkhawm lo awm tur hi budget session a ni ang a. Assembly inkhawm hi nitin chawhma dar 10:30-ah tan tur a ni a. Ni engzat chhung nge inkhawm tur tih leh inkhawm hun hman chhoh dan tur chu Assembly Speaker Lalbiakzama kaihhruai Business Advisory Committee (BAC) thukhawmin an la rel ang.

CSPOC-ah Speaker leh Deputy Speaker tel

Dated : 28th Conference of Speakers and Presiding Officers of the Commonwealth (CSPOC) chu 15.01.2026 khan Central Hall, Samvidhan Sadan, Parliament House Complex, New Delhi ah India Prime Minister Narendra Modi an a hawng. Conference hi Om Birla, Speaker of Lok Sabha kaihhruaina hnuaiah hman a ni.

  Conference ah hian Mizoram Speaker Lalbiakzama leh Deputy Speaker Lalfamkima bakah Lalthangmawia, Addl. Secretary te Mizoram Legislative Assembly aiawhin an tel a ni.

  Conference of Speakers and Presiding Officers of Commonwealth (CSPOC) hi kum 1969 ah a vawikhatna atan neih tan niin, tun tum hi a vawi 28 na niin, India in tum li (4) a thlenna a ni. He conference hmang tur hian Commonwealth ram hrang hrang 53 atangin palai thahnem tak an a kal khawm a, Conference chhung hian thupui 5 sawiho a ni.

Ruang Phurh Online Portal Hawn a ni

Aizawl: January 15, 2026 khan Aijal Club ah Social Welfare Minister Lalrinpuii chuan sawrkar program ngaih pawimawh berte zinga mi “Ruang Phurh” online portal a hawng.

  “Ruang Phurh” online portal hi Mizoram State e-Governance Society (MseGS), ICT Department siam a ni a, ruang phurh sawrkar sum hmanga kalpui mek chu chak zawka kalpui a nih theih nan leh mi tam zawkin awlsam zawk a an chhawr theih nan ruahman a ni.

  Ruang phurh online portal hi google play leh app store atanga download theih niin, vawiin ni thlenga ruangphurhna application lut tawh zat hi 1680 a ni a, cheng nuai 175.85 pek chhuah tawh a ni.

State Level Mock Exercise on Earthquake district tinah nei

Aizawl: Chhiatrupna thlen thulha chhanchhuah leh chhawmdawl hna kalpui dan tur, a taka enchhinna 'State Level Mock Exercise on Earthquake' chu National Disaster Management Authority leh Disaster Management & Rehabilitation Department bultumin January 15, 2026 khan Mizoram district tinah kalpui a ni. 

  Lirnghing avangin Mizoram district hrang hranga hmun 36-ah inchim, kangmei chhuak leh chhiatna hrang hrang thlen theih dan lem chan a ni a. District Emergency Operation Centre-te, Incident Site Commander-te, Staging Area Management leh Relief Camp-a hmalaknate chu Video Conference kaltlangin vilpui a ni a. Brig. Ravinder Gurung (Retd.) Sr. Consultant, NDMA chuan State Emergency Operation Centre atangin heng chetlaknate hi thlirpuiin DM&R Principal Secretary hlui PC Lallawmsanga, IPS (Retd.) leh DM&R Director hlui Dominic Lalhmangaiha te chuan State Observer angin an telpui bawk a ni.

  Khaw thim hnua chhanchhuah leh chhawmdawl hna kalpui kawngah harsatna a awm leh awm loh hriat a nih theih nan State Level Mock Exercise hi tlai dar 5 atangin kalpui leh a ni bawk.

National Motorcyle Racing Championship pahnihna lawmpuina hun hmang

Aizawl: Sports & Youth Services Minister Lalnghinglova Hmar chuan January 15, 2026 khan FMSCI Indian National Motorcyle Racing Championship 2025 a an inelna huanga pahnihna ni thei K. Lalnunsanga chu MINECO a a office chamber-ah lawmpuina hun a hmanpui a, lawmpuina pawisa fai a hlan tel.

  K. Lalnunsanga, Electric Veng, Aizawl hi MRF leh Madras Motorsports Club in a buatsaih Federation of Motor Sports Clubs of India (FMSCI) Indian National Motorcycle Racing Championship (INMRC) 2025-ah hian Stock 130-165cc Novice Category-ah inel in a pumpuiah pahnihna a ni. June 2025 atang January 2026 chhung khan round nga inelna neih niin intlansiak vawi 10 tlan a ni a, Nunsanga hi vawi hnih pakhatna niin vawi li pahnihna a ni bawk a ni.