TNT-ah Free Clinic nei

Aizawl : National Urban Health Mission, NHM Mizoram hmalaknain March 6, 2025 khan a thlawna inentirna (Free Clinic) TNT, Muanna Vengah neih a ni a, he free clinic ah hian damlo 600 vel en an ni a, natna chi hrang hrang an vei tih hmuhchhuah a ni.

   He Free clinic-ah hian doctor 10 ten damlo an en a, damdawi chi hrang hrang a thlawnin Rs 2,50,000 man vel sem a ni a. National Health Mission hnuaia Programme - NUHM, NLEP, NIDDCP, NTEP, NCD leh MSACS thawktute'n natna chi hrang hrang an hriselna te endikin, programme hrang hrang atang hian thawktu 50 vel an kal bawk.

Dynamo hmanga Sangha mantute intiam

Aizawl : March 1, 2025 -a khan Bungzung khua, Tuipui luiah Dynamo hmanga sangha man mi panga (5) te chu vawiin khan Fisheries Act bawhchhe nawn tawh lo turin District Fisheries Development Officer Lalremsangpuii hnenah an intiam.

   Heng an mi mante hi The Mizoram Fisheries Act (Amendment) 2022 Sec-(6) Prohibition of Unauthorized Catching of Riverine fish, Compounding of Offences Section-10(1&2) huaiah cheng sang li (? 4000) theuh chawi tir an ni. Fisheries Act bawhchhe nawn tawh lo turin District Fisheries Development Officer Lalremsangpuii hnenah 6.03.2025 hian an intiam a ni. Luidunga nungchate duat taka enkawl tur leh an chetvelna tichereu lo tura hrilhhriat an ni bawk.

Delhi Judicial Service ah Mizo tling

Aizawl : March 4, 2025 khan Delhi Judicial Service ah Benjamin Vanlalvena S/o VL Luaha Renthlei Luangmual, Aizawl chu a tling niin ZALEN in thu a dawng.

   Delhi Judicial Service exam mi 16,000 exam zingah prelims a tling 600 zingah Benjamina hi a tel a, chung zing atang chuan mi 156-in main exam inziak tlingin interview an hma chhawn leh a, hetah hian a la ni. Hriat theih chinah Benjamin Vanlalvena hi Delhi Judicial Service a Mizo tling la awmchhun a ni.

Iskut chingte tan leitha sem

Aizawl : Mission Foundation Movement (MFM) chuan March 3, 2025 khan Sihphir, Lungdai leh Durtlang-a Mizoram Iskut Grower Association te hnenah Iskut enkawlna atana hman tur Leitha semna hun an hmang a, hmanpuitu Agriculture Minister PC Vanlalruata chuan Iskut chingtute tan theihtawp an chhuah tur thu leh Sawhthing fai leh tha hmuh an inbeisei thu a sawi.

   He hunah hian Iskut chingtu chhungkaw 60 hnenah Leitha sem a ni a, he project hi Ministry of Tribal Affairs hnuaia Support to Tribal Research Institute fund niin Social welfare & Tribal Affairs Department kaltlanga thawh a ni.

Mizo National Day hmang

Aizawl : Mizo National Front chuan Mizo National Day champha vawi 58-na chu March 3, 2025 khan Mizo Hnam Runah urhsun takin an hmang a, zalenna suala Martarte sunna hun ngawirengin minute khat dingin hman a ni.

   He hunah hian MNF President Zoramthanga chuan thu sawiin, "MNF ten Zalenna puang a, India kan kah chhan chu, November 26, 1949-a India siamna Constitution of India Preamble-ah Mizo te kan tel ve loh avang leh Excluded area kan nih avanga India-a kan tel ve na tur chuan kan ai awh ten kan ngaihdan leh duhdan sawi ve duh kan nei ti-a October 30, 1965-a Pu Laldenga leh India President Lal Bahadur Shastri bakah khatih laia Assam CM Chaliha telna ngeia Guwahati-a sawihona bawhzui kawngah kawng dang min hawisan a, Sipai tha chakna hmanga hnehchhuh leh awp beh luih min tumna chhanna atan loh theih lohin kan ram leh kan hnam humhim nan India chu kap ta kan ni," a ti.

Paediatrics Surgeon khawmpui hmanpui

Aizawl : Mizoram Legislative Assembly Speaker Lalbiakzama chuan ASM (ASMCON) Inkhawmpui vawi 5-na leh India Association of Paediatrics Surgeon (NEIAPSCON) inkhawmpui vawi 19-na, March 6 & 7, 2025-a neih chu Aijal Club ah Khuallian niin a hmanpui.

   Speaker chuan Paediatrics Surgeon-te hnathawh pawimawh zia te sawiin an hna pawimawh tak chu inpekna zawng zawng nena thawk turin a fuih a. Damlo te enkawl damna atan an thiamna te intathriam reng tur te, mihring anga midangte kan hriatthiamna leh lainatna nena damlo te enkawl a, damna thlen tu nih tum zel turin a chah bawk.

Planning Board Vice Chairman-in Web Offset Press hawng

Aizawl : March 6, 2025 khan Color Web Offset Press chu Phunchawng-ah hawn a ni a. Hei hian khawlchhutna lama changkanna rahbi pawimawh tak a thlen ngei a beisei thu Khuallian Planning Board Vice Chairman Dr. Kenneth Chawngliana chu a sawi.

   Dr. Kenneth Chawngliana chuan, MPOA-in harsatna tin reng kal tlanga Color Web Offset Press tha tak mai Mizoram chhunga an bun ta hian Mizoram chu lehkhabu leh thildang chhutna kawnga intodelhna kawngah Mellung pawimawh tak a phun a ni, a ti a. Hemi kawnga hma latu Mizoram Press Owners' Association hruaitute leh Mizoram Science, Technology & Innovation Council (MISTIC) hruaitute hian Kut benga chawimawi an phu a ni, a ti.

   Samuel Lalmalsawma, Principal Scientific Officer, MISTIC chuan he thil lo zik chhuah chhoh dan tlangpui a sawi a Mizoram Press Owners' Association (MPOA) aiawhin Lalthangvunga'n technical report a pe bawk.

Chapchar Kut hawnna hmang

Aizawl : EF&CC Minister Lalthansanga hovin Chapchar Kut 2025 hun khatna chu March 6, 2025 khan Lammual-ah hman a ni. Kumin Chapchar Kut ah hian Aizawla a lawmna pui ber chu ni hnih chhung hman niin a ni khatnaah hian EF&CC Minister chu khuallian an ni.

   Programme-ah hian CYMA Vice-President Prof. Lalnuntluanga chuan thuhma neiin, Prof. Malsawmliana, Chapchar Kut Organizing Committee chuan kalkhawmte lawmna thu a sawi a. Kumin Chapchar Kut lawmnaah hian a bik takin Mizoram pawn atangin Manipur Group YMA, Tripura Group YMA , Shillong Group YMA, Halfong Branch YMA leh Tlangram Indigenous People hruaitute sawm an ni a. Lam entir turin Pang Cultural Troupe, Paite Cultural Troupe, Bawm Cultural Troupe, Hmar Cultural Troupe, Nagaland Cultural Troupe (NEZCC kaltlangin) leh Fiji atangin cultural troupe (ICCR kaltlanga) te an rawn kal a ni.

Paddy & Rice Procurement Committee thukhawm

Aizawl : Chief Minister Lalduhoma hovin a office-ah March 5, 2025 khan Mizoram State Government Paddy & Rice Procurement Committee te an thu khawm.

   Mizoram sawrkar chuan Mamit leh Kolasib district atanga Loneitute thar chhuah buhhum lei a, Om Om Modern Rice Mill, Pangbalkawn, Kolasib district hmanga her a lo rel tawh a. Buhhum hi Kg-ah Cheng 30 zelin Rice Mill hmunah a lei a, hei hi sawrkar laipui leina (Minimum support price) aiin a tha zawk hle a ni. Meeting hian an sawiho a, Om Om Rice Mill nena thawhho dan te pawh an sawi lang.

Drugs Abuse Prevention programme hmang

Aizawl : March 4, 2025 khan Social Welfare & Tribal Affairs Minister Lalrinpuii chuan I&PR Conference Hall, Lianchhiari Run-ah, Ruihhlo hman khawlohna laka invendan tur zirhona hun 'Capacity Building Programme on Drugs Abuse Prevention' chu khuallian niin a hawng.

   Programme hawnna hunah hian Social Welfare & Tribal Affairs, Women & Child Development Department hotute bakah, kohhran hrang hrang hruaitute leh tlawmngaipawl thenkhatte, ruihhlo do kawnga thawktute thahnem tak an tel a. hawnna hun hman hi Social Welfare & Tribal Affairs Director Dr. Lalhriatzuali Ralte chuan kaihruaiin, kalkhawmte awmna thu leh hun hmandan tlangpuite a sawi a. Kalkhawmte hnen atangin programme hman chhunga an beiseinate ngaihthlak a ni.

Art & Photo Exhibition hawng

Aizawl : March 4, 2025 khan Vanapa Hall-ah kumin Chapchar Kut puala Art & Photo Exhibition buatsaih chu I&PR Secretary Betsy Zothanpari Sailo chuan mipui tlawh turin a hawng.

   Exhibition ah hian Mizoram Art Development Society (MADS) atangin member 67 te’n an kutchhuak tarchhuakin, Mizo Photograpers’ Society (MPS) member te kutchhuak 120 chuang phochhuah a ni bawk.

   Exhibition hi Chapchar Kut Ni thlenga neih a ni a. Tlawhtuten Exhibition a phochhuah thlalak leh lemziak te hi a hmunah an lei thei nghal bawk a ni.